فوتو: National Business

فرانتسيا ۇكىمەتى ەلدەگى ەلەكتر ەنەرگياسى وندىرىسىندەگى اتوم ەلەكتر ستانسالارىنىڭ ۇلەسىن قازىرگى 75 پايىزدان 50 پايىزعا دەيىن ازايتۋدى جوسپارلاپ وتىر. بۇل تۋرالى فرانتسيانىڭ كەشەندى ەكولوگيالىق وزگەرىستەر ءمينيسترى نيكوليا يۋلو مالىمدەدى.

بۇگىنگى تاڭدا فرانتسيادا 58 رەاكتور جۇمىس ىستەيدى. فرانتسيا اتوم ەلەكتر ستانسالارىندا وندىرىلەتىن ەنەرگيا كولەمى بويىنشا الەمدە - ەكىنشى، ال اتوم ەنەرگەتيكاسىنىڭ ۇلەسى بويىنشا -  بىرىنشى ورىندا. ەنەرگياسىنىڭ قۋاتتىلىعى جونىنەن تەڭدەسسىز سانالعانىمەن، اتوم ەلەكتر ستانسالارىنىڭ ادام دەنساۋلىعى مەن قورشاعان ورتاعا تيگىزەر زاردابى وراسان. قازىرگى جاسىل ەكونوميكا جانە بالامالى ەنەرگيا كوزدەرىنە ءوتىپ وتىرعان الەمدىك تەندەنتسيادان فرانتسيا دا قالىس قالعىسى كەلمەيدى.

فرانتسيانىڭ كەشەندى ەكولوگيالىق وزگەرىستەر ءمينيسترى نيكوليا يۋلو: «اتوم ەلەكتر ستانسالارىندا وندىرىلەتىن ەنەرگيا كولەمىن 75 پايىزدان 50 پايىزعا دەيىن قىسقارتۋ كەرەك. بۇل ءۇشىن بىرنەشە جۇمىس ىستەپ تۇرعان رەاكتورلاردى وشىرۋگە تۋرا كەلەدى. ەرەكشە زەرتتەۋدى تالاپ ەتەتىن ماسەلەدە اسا مۇقيات بولعان ءجون. قازىرگى ەسەپ بويىنشا، شامامەن 17 رەاكتوردىڭ قىزمەتىن توقتاتۋ جوسپارلانعان»، - دەدى.

ايتا كەتەيىك، قازاقستان كەرىسىنشە،  اتوم ەلەكتر ستانساسىن سالۋ تۋرالى شەشىمدى 2018 جىلدىڭ سوڭىنا قاراي قابىلداماق. ءتىپتى  كۋرچاتوۆ قالاسى مەن بالقاش كولىنە جاقىن ماڭداعى ۇلكەن اۋىلى اەس سالىناتىن ايماقتار رەتىندە ناقتىلانىپ وتىر.

“The Qazaq Times”