فوتو: thinking-taiwan.com.

اقش سەناتىنىڭ قارۋلى كۇشتەر كوميتەتى (Senate Armed Services Committee) جاريالاعان جىلدىق قورعانىس ەسەبىندە اقش-تىڭ تايۆانعا قاراتقان ساياساتىندا بىرقاتار تۇزەتۋلەر ەنگىزىلگەنى بەلگىلى بولدى. بۇل تۇزەتۋلەر بويىنشا اقش-تىڭ تىنىق مۇحيت باتىس جاعالاۋىنداعى اسكەري كەمەلەرى تايۆان پورتتارىنا تۇراقتاۋى مۇمكىن. بۇل ەڭ الدىمەن رەسمي بەيجىڭ تارابىنىڭ نارازىلىعىنا ۇشىرايتىنى انىق.

سەناتتىڭ قارۋلى كۇشتەر كوميتەتىندەگى ەكى پارتيا مۇشەلەرى اراسىنان 21-گە قارسى التى ادام قارسى داۋىس بەردى. تايۆان جاق اقش تەڭىز اسكەري كەمەلەرىن كەز-كەلگەن قولايلى پورتىندا قابىلداۋى مۇمكىن. الايدا، بۇل جوبادا تايۆان كەمەلەرىن اقش-تىڭ تىنىق مۇحيت اسكەري قولباسشىلىق شتابى قابىلداپ الۋى تۋرالى ايتىلماعان. ەگەر بۇل شەشىمدى كونگرەسس بەكىتىپ وتكىزەر بولسا، وندا اقش پەن قىتاي اراسىندا قول قويىلعانىنا 40 جىلدان اسقان «ۇلكەن قىتاي» كەلىسىمى (تايۆان قىتايدىڭ ءبىر پروۆينتسياسى دەپ قارالاتىن كەلىسىم) كۇشىن جويعانمەن بىردەي.

اتالعان قورعانىس ەسەبى قاۋىپسىزدىك ساياساتتارىن جانە بيۋدجەتتىڭ شىعىس دامىتۋعا باعىتتالعان. وندا 2018 جىلدىڭ اسكەري شىعىستارعا بولىنگەن قارجىسى 6,4 ملرد اقش دوللارى دەپ كورسەتىلگەن. سونداي-اق جاڭا ساياساتى بويىنشا، تايۆان جەرگىلىكتى سۋ استى سوعىس مۇمكىندىگىن دامىتۋعا كومەكتەسۋ ءۇشىن قورعانىس ىستەرى جونىندەگى بولىمىنە ارناۋلى مىندەتتەر جۇكتەلگەن. وعان قوسا تايۆانمەن ستراتەگيالىق ىنتىماقتاستىقتى نىعايتۋ جوباسى دا بار.

بۇل تۋرالى اقش-تاعى قىتاي ەلشىلىگى پىكىر بىلدىرۋدەن باس تارتتى. ۋاشينگتوننىڭ بەيجىڭگە قاراتقان پوزيتسياسىنىڭ سالقىنداۋى الداعى وڭىرلىك قايشىلىقتاردىڭ ۇلعايۋىنا سەبەپ بولىپ قالماق. سەبەبى، سولتۇستىك كورەيانى كەلىسسوز ۇستەلىنە اكەلۋدە قىتاي ارا اعايىن بولعالى وتىر. بىراق، قىتايدىڭ ارا اعايىندىق جۇمىستارىنا اقش-تىڭ كوڭىلى تولماي وتىر. بۇل ارەكەتتەر ءبىر جاعىنان قىتايدىڭ سولتۇستىك كورەياعا ەرتەرەك قىسىم جاساۋىن تەزدەتۋ ءۇشىن جاسالعان قادامدار بولۋى مۇمكىن. الايدا، قىتاي مەن اقش اراسى بۇلىنسە شىعىس ازيا قايشىلىعى ميداي بىلىعادى دەگەن ءسوز.

“The Qazaq Times”