قىتايدا جانكەشتى جارىلىس جاسادى

قىتاي ۇكىمەتى رەسمي مالىمدەمە جاريالاپ، ەلدىڭ شىعىس پروۆينتسيالارىنىڭ بىرىندە ورىن العان جارىلىستان 8 ادام قازا تاپقانىن حابارلادى. جارىلىس 15 ماۋسىم كۇنى تۇستەن كەيىن، جياڭسۋ پروۆينتسياسىنداعى ءبىر بالاباقشانىڭ ماڭىندا ورىن العان. بۇل تۋرالى «The Wall Street Journal» باسىلىمى حابارلاپ وتىر.

جەرگىلىكتى باق وكىلدەرىنىڭ حابارىنا سۇيەنسەك، جارىلىستى باستاپقىدا قاقپا ماڭىنداعى تاماق ساتاتىن جىلجىمالى دۇڭگىرشەكتىڭ گاز باللونىنان تۋىنداعان دەگەن بولجام جاسالعان. قىتاي ۇكىمەتىنىڭ رەسمي ءباسپاسوز قىزمەتى ەلدىڭ ورتالىق تەلەۆيزياسىنا (China Central Television/CCTV) بەرگەن حابارىندا، مەملەكەتتىك قاۋىپسىزدىك ورگاندارىنىڭ مالىمەتى بويىنشا جارىلىستى 22 جاستاعى ءشۇي (Xu) ەسىمدى ەر ادامنىڭ جاساعانى انىقتالدى دەدى.  جارىلىس تۋدىرۋشى ءوزى دە قازا تاپقان.

جارىلىس بولعان بالالار باقشاسى. فوتو: The Wall Street Journal.

قىتاي ورتالىق تەلەۆيزياسىنىڭ بەرگەن حابارىندا، وقيعادا 8 ادام قازا بولىپ، 65 ادام ءتۇرلى جاراقات العان. تەرگەۋشىلەردىڭ ايتۋىنشا، جارىلىس بولعان جەردەن قولدان جاسالعان جارىلعىشتىڭ قالدىقتارى تابىلعان. سونداي-اق، بالاباقشا جانىنداعى قابىرعالارعا «ءولىم»، «ءولتىرۋ»، «قىرۋ»، «جارۋ» دەگەن سوزدەردىڭ جازىلعانى ايتىلدى.

جارىلىس قىتايدىڭ جياڭسۋ پروۆينتسياسىنا قاراستى ءشۇيجوۋ قالاسىندا بولعان. جەرگىلىكتى ۇكىمەت ورىننىڭ ايتۋىنشا، جارىلىس بولعان كەزدە بالاباقشاداعىلار جۇمىستان قايتىپ كەتكەندىكتەن، زارداپ شەككەندەر اراسىندا بالالار مەن بالاباقشا قىزمەتكەرلەرى بولماعان.

“The Qazaq Times”