قىتاي ۇكىمەتى سولتۇستىك كورەياعا قاتاڭ ەسكەرتۋ جاسادى

قىتاي ورتالىق تەلەۆيزياسىنىڭ بۇگىنگى حابارىندا، سولتۇستىك كورەيانىڭ 4 ماۋسىم كۇنى «مارس-14»  اتتى زىمىرانىن ۇشىرعانى تۋرالى ايتىلدى. سونىمەن بىرگە، وسى ارەكەتكە قاراتا قىتايدىڭ سىرتقى ىستەر مينيسترلىگىنىڭ مالىمدەشىسى گىڭ شۋاڭ ءباسپاسوز جينالىسىندا بىرىككەن ۇلتتار ۇيىمى قاۋىپسىزدىك كەلىسىمشارتتارىن بۇزىپ،  ەشبىر ەلدىڭ ەسكەرتۋىن ەلەپ-ەسكەرمەي ءوز بەتىنشە كوپ رەت زىمىراندار سىناعىن جاساعان سولتۇستىك كورەيا بيلىگىن سىنعا الدى.

گىڭ شۋاڭ سوزىندە: «قىتاي ۇكىمەتى تۇبەك ماسەلەسى جايلى ەجەلدەن بەرى ۇستانىپ كەلە جاتقان پىكىرىنەن اۋىتقىمايدى. ءبىز سولتۇستىك كورەيانىڭ بۇۇ قاۋىپسىزدىك  كەلىسىمشارتتارىن  بۇزعانىن ايىپتايمىز، ءارى،  قاتاڭ ەسكەرتەمىز. سونداي-اق، كۇننەن-كۇنگە ۋشىعىپ كەلە جاتقان كورەيا تۇبەگى ماسەلەسىن ودان ارى شيەلەنىستىرمەي، ءار ەلدىڭ سابىر ساقتاپ،  بەيبىت كەلىسىمدەر ارقىلى كەڭەسۋىن ءۇمىت ەتەمىز» - دەدى.

ىرگەلەس ەلدەر عانا ەمەس،  جاسىل شارداعى كوپتەگەن مەملەكەتتەردى الاڭداتىپ وتىرعان كورەيا تۇبەگى ماسەلەسى شەشىم تاپپاعانىنا شيرەك عاسىر ءوتتى. قايشىلىقتىڭ شەشىم تابۋىنان ءۇمىت وتى كورىنسە،  زىمىراندارىن سىناققا الىپ شىعاتىن كيم اۋلەتىنىڭ تاۋەكەلشىلدىگىنەن ءتورت توڭىرەك تىكسىنىپ وتىر.

ادىلەت احمەتۇلى

“The Qazaq Times”