تۇرىك جانە تۋنيس ءسىم باسشىلارى. فوتو: "تۇرىك تەلە-راديو".

كاتار داعدارىسى باستالعالى بەرى، تۇركيا جاق بەلسەندى ارا-اعايىندىق جاساپ كەلەدى. تۇرىك پرەزيدەنتى ەردوعان دا بۇل ىسكە بەلسەنە كىرىسكەنى بايقالادى. «اناتولى» اقپاراتتىق اگەنتتىگىنىڭ حابارىنا قاراعاندا، تۇركياعا ساپارلاي بارعان تۋنيس سىرتقى ىستەر مينيسترىمەن كەزدەسكەن تۇركيا ءسىم باسشىسى ءماۆلۋت چاۆشوعلۇ دا تۇركيانىڭ كاتار داعدارىسىن جاقسارتۋعا بارىن سالاتىنىن ايتقان.

تۇرىك ءسىم باسشىسى سوزىندە: «ءبىز باۋىرلاس ەلدەر اراسىنداعى ديپلوماتيا داعدارىسىن جاقسارتۋعا، شىن نيەتىمىزبەن كۇش سالىپ كەلەمىز. بۇل كەزەكتە تۋنيس تە ءوزىنىڭ وڭ ىقپالىن كورسەتىپ وتىر. دەگەنمەن مۇسىلمانداردىڭ قاسيەتتى ايىندا كەيبىر اراب ەلدەرىنىڭ باۋىرلاس كاتارعا مۇنداي قىسىم جاساۋى مۇسىلماندىققا جات»، – دەدى.

ەكى ەل مينيسترلەرى ءبىر اۋىزدان كاتار داعدارىسىن وڭاۋ ءۇشىن شىعاناق ىنتىماقتاستىق كەڭەسىندە ورتاق تالقىلاپ، كەلىسسوزدەر ارقىلى عانا شەشىلەدى دەپ تاپتى. تۋنيس جاق اتالعان ماسەلەنى شەشۋدە تۇركيانىڭ ۇستانىمىن تولىقتاي قولدايتىنىن جەتكىزدى.

“The Qazaq Times”