فوتو: akorda.kz

قازاقستان پرەزيدەنتى نۇرسۇلتان نازارباەۆ باق وكىلدەرىنە ۇيىمداستىرىلعان بريفينگتە  قازاقستان مەن گرۋزيا اراسىندا تاتۋ كورشىلىك پەن تۇراقتى قارىم-قاتىناس ورنىققانىن اتاپ ءوتتى.

– بۇگىن وسى جۇزدەسۋدىڭ بولعانىنا قۋانىشتىمىز. گرۋزيا پرەزيدەنتى گەورگي مارگۆەلاشۆيليدىڭ ساپارى دۇنيەجۇزىلىك «ەكسپو-2017» كورمەسىنىڭ اشىلۋىنا ورايلاس كەلدى. سونىڭ اياسىندا گرۋزيا پاۆيلونى اشىلادى. قازاقستان مەن گرۋزيا اراسىنداعى بۇگىنگى قارىم-قاتىناستار تۇراقتى سيپاتقا يە بولىپ وتىر. ءبىز تاريحي، دوستىق ىنتىماقتاستىعىمىزدى ەشقاشان ۇزگەن ەمەسپىز، – دەدى مەملەكەت باسشىسى.

قازاقستان پرەزيدەنتى اۋقىمى كەڭ ماسەلەلەر بويىنشا كەلىسسوزدەر بارىسىندا «ءبىر بەلدەۋ، ءبىر جول» باستاماسى اياسىندا ءوزارا ءتيىمدى ءىس-قيمىل جاساۋ مۇمكىندىكتەرى قاراستىرىلعانىن ايتتى.

گرۋزيانى قازاقستان سياقتى ترانزيتتىك مەملەكەتكە اينالدىرۋعا مۇمكىندىك بارىن ەسەكەرە وتىرىپ، قارا تەڭىز ارقىلى ەۋروپاعا شىعۋعا بولادى. گرۋزيا ارقىلى وتەتىن گاز بەن مۇناي كولىك دالىزدەرى دە بار. وسىعان وراي قازاقستان كومپانيالارىنا تيەسىلى باتۋمي مۇناي تەرمينالى مەن پورتىنىڭ مۇمكىندىكتەرى تالقىلاندى.

مەملەكەت باسشىسى بۇل جول بارلىق مۇددەلى ەلدەر ءۇشىن پايدالى بولاتىنىن جانە ونىڭ قازاقستاننىڭ كولىك الەۋەتىن ارتتىرا تۇسەتىنىن ايتتى. بۇدان بولەك، نۇرسۇلتان نازارباەۆ گۋمانيتارلىق جانە ءبىلىم سالالارىنا قاتىستى قول جەتكىزىلگەن ۋاعدالاستىقتار تۋرالى اڭگىمەلەدى.

“The Qazaq Times”