فرانتسيانىڭ جاڭا پرەزيدەنتى العاشقى جۇمىس كۇنىن شەتەلدە وتكىزدى

فرانتسيانىڭ جاڭا پرەزيدەنتى ەممانۋەل ماكرون كەشە تۇستەن بۇرىن رەسمي پرەزيدەنت بولىپ تاعايىندالدى جانە بىردەن قىزمەتكە كىرىستى. ول پرەزيدەنت رەتىندە العاشقى جۇمىسىن ۇكىمەت باسشىسىن تاعايىنداۋدان باستادى. ماكرون پرەمەر-مينيستر ەتىپ ەدۋارد ءفيليپپتى (Edouard Philippe) بەلگىلەدى. بۇل تۋرالى «The Wall Street Journal» باسىلىمى حابارلاپ وتىر.

كەشە تۇستەن بۇرىن رەسمي قىزمەتكە تاعايىندالعان ەممانۋەل ماكرون بىردەن پرەزيدەنتتىك قاربالاس جۇمىسىنا كىرىسىپ كەتتى. ول وسىعان دەيىن رەسپۋبليكاشىلدار پارتياسىندا ماڭىزدى قىزمەت ەتىپ كەلگەن ەدۋارد ءفيليپپتى ءوزىنىڭ پرەمەر-ءمينيسترى ەتىپ بەلگىلەدى. كەلەسى ايداعى پارلامات سايلاۋىنا دەيىن ول بۇرىنعى ساياسي پارتيا وكىلدەرىن ءوز جاعىنا تارتۋعا تىرىسادى. ول ءوزىنىڭ جاڭا پارتيا قۇرامىن تولىقتىرۋدا. فرانتسيانىڭ كەيبىر قوعامدىق ساياسي پارتيالارى الدەقاشان ماكروننىڭ جاڭا پارتياسىنىڭ كانديداتتىعىن قولداپ وتىر. الايدا، رەسپۋبليكاشىلدار پارتياسى ءالى دە تولىقتاي كەلىسىم بەرمەدى.

ۇكىمەت باسشىسىن تاعايىنداي سالىسىمەن ماكرون شەتەلگە ساپارىن باستادى. ول بەرلينگە مەملەكەتتىك ساپارمەن بارىپ، گەرمانيا كانتسلەرى انگەلا مەركەلمەن كەزدەستى. ەكەۋى ارا جىلى لەبىزدە پىكىرلەسىپ، ەو-نىڭ جاڭا شارتىن جاساۋ، ەۋروپالىق وداقتى نىعايتۋ تۋراسىندا كەڭەس وتكىزدى. گەرمانيا كانتسلەرى ماكرونمەن بىرلەسە وتىرىپ جاڭا ءارى كەڭەيتىلگەن ەكى جاقتى كەلىسىمدەردى دامىتاتىندىعىن، ەكى ەل وكىلدەرى ماۋسىم ايىنداعى فرانتسياداعى پارلامەنت سايلاۋىنان كەيىن جوعارى دەڭگەيدەگى كەلىسسوز وتىرىسىندا جۇزدەسەتىنىن ايتتى.

“The Qazaq Times”