پۋتين اقش جاريالاعان سانكتسياعا پىسقىرماي وتىر

كەشە، ياعني، 30 جەلتوقسان سولتۇستىكتەگى كورشى ەلدىڭ پرەزيدەنتى ۆ. پۋتين «وباما جاريالاپ وتىرعان سانكتسيا» تۋرالى «قاپەرىنە دە المايتىن» ۇستانىمدا تۇراتىنىن جاريالادى.

اقش-تىڭ قىزىمەتتەن كەتە قويماعان پرەزيدەنتى باراك وباما قۇراما شتاتتارداعى پرەزيدەنت سايلاۋ ىسىنە ارالاستى دەگەن ايىپپەن، 29 جەلتوقسان كۇنى رەسەيلىك بارلاۋ جانە قاۋىپسىزدىك ورگاندارى مەن جوعارى لاۋازىمدى تۇلعالارىنا قاراتا سانكتسيا جاريالاعان بولاتىن. سوعان ساي، وتىز بەس رەسەي ديپلوماتىن ەلدەن شىعارۋ مەن بىرگە اقش-تاعى رەسەي سىرتقى ىستەر مينيسترلىگىنىڭ جىلجىمايتىن مۇلىكتەرىنە دە توسقاۋىل قوياتىن بولعان. بۇنىڭ بۇرىنعى سانكتسيالاردان ايىرماشىلىعى – رەسەي سىرتقى ىستەر مينيسترلىگىن ايىپتاپ مالىمدەمە جاساۋمەن شەكتەلمەي، قايتا، بىردەن ناقتى ارەكەتتەرگە بارىپ وتىر.

سانكتسيا جاريالانعان كۇنى ءار ەلدىڭ اقپارات قۇرالدارىندا بۇعان قارسى رەسەي قانداي شەشىم قابىلدايدى دەگەن تاقىرىپ تالقىدانا باستاعان ەدى. رەسەي سىرتقى ءمينيسترى سەرگەي لاۆروۆ ۆ. پۋتينگە: وبامانىڭ تالابى بويىنشا ديپلوماتتاردى شىعارىپ اكەتىپ، رەسەي سىرتقى ىستەر مينيسترلىگىنىڭ تۇراقتى مۇلكىن قايتارۋ تۋرالى ۇسىنىس ايتقان ەدى. الايدا، پۋتين بۇل ۇسىنىستان باس تارتتى. دەسە دە، اقش جاريالاعان سانكتسياعا قارسى شارالار جاساۋعا دا نۇسقاۋ بەرگەن جوق. جاۋاپكەرشىلىكتى ءوز موينىنا الاتىن سىڭاي تانىتتى. ونىمەن قويماي، پۋتين كرەملدەگى جاڭا جىلدىق كەشكە  امەريكالىق ديپلوماتتى شاقىراتىنىن ايتتى.

وبامانىڭ ويى، اقش-تىڭ جاڭا سايلانعان پرەزيدەنتى ترامپ پەن امەريكالىقتاردىڭ كوڭىلدى مەرەكە وتكىزۋى ەدى. پۋتيننىڭ وعان مىسقىلدى كەكەسىن ارالاسقان «جومارت» تا ، «جىلى» جاۋاپ قاتۋى اقش اقپارات الەمىنە جاساعان توسىنسىيمەن بىردەي بولدى. ترامپتىڭ تاققا وتىرۋىنا قارسى كوزقاراستاعى كەيبىر باق وكىلدەرى پۋتيننىڭ بۇل شەشىمىن تاپقىرلىق دەپ «لايك» باستى.

پۋتيننىڭ بۇل قادامى تاڭقالارلىق، ءتىپتى ورەسكەل كورىنسە دە، شىن مانىندە ورىندى شەشىم دەۋگە دە بولادى. سەبەبى، وباما اقۇيدە وتىرعان سەگىز جىلدا اقش پەن رەسەي قارىم-قاتىناسى بىتپەس داۋ-دامايعا ۇلاستى. الايدا، جۋىق ارادا وباما بيلىكتەن كەتەدى دە، ءبىر قاراعاندا رەسەيمەن دوستىق قاتىناسقا قۇشتار ترامپ كەلەدى. بۇل، ارينە رەسەي ءۇشىن قۋانارلىق ءىس. وباما جاريالاعان سانكتسيا ترامپ پەن پۋتين اراسىنا سىنا قاعۋ دەپ قاراعان رەسەي جاق، ونى ەلەۋسىز قالدىرۋ ارقىلى، پرەزيدەنتتىك ورنىنان كەتۋگە جاقىن وباما ۇكىمەتىنە مىسقىل جاۋاپ قاتىپ وتىر. الايدا، ترامپتىڭ تاققا وتىرۋى رەسەيگە قانشالىق پايدا اكەلەدى،  ول جاعى ءالى بەلگىسىز.

"The Qazaq Times"