بۇگىنگى تاڭدا ەلىمىزدە ءداستۇرلى ەمەس يسلام اعىمدارىمەن كۇرەسۋ كەرەكتىگى جايىندا ءجيى ايتىلىپ ءجۇر. بۇل سوڭعى ۋاقىتتا قازاقستاندا جالپى الەمدە بولىپ جاتقان تەررورلىق ارەكەتتەرگە بايلانىستى ەكەنى بەلگىلى. بىراق، بۇل كۇندە ەلىمىزدە ءداستۇرلى ەمەس يسلام اعىمدارىنان بولەك، باسقادا ءدىني سەكتالاردىڭ بار ەكەندىگىن ەستەن شىعارىپ العان ءتارىزدىمىز. بۇگىن ءبىز قازاق قوعامىنا ءوزىنىڭ كەرى اسەرىن تيگىزىپ، حالىق ساناسىن ۋلاپ جاتقان سول ءدىني سەكتالارعا توقتالۋدى ءجون كوردىك.
قازاقستان تاۋەلسىزدىك الىعان 26 جىل ىشىندە ەلىمىزگە كىم كىرمەدى دەيسىز «يەگوۆا كۋاگەرلەرىنەن» باستاپ، «كريشنايت»، «نوۆاپوستول شىركەۋى»، «يۋديزم»، «مەتوديستەر»، «باحاي»، «مۋنا بىرلەستىگىنىڭ شىركەۋى» سىندى ءبىز اتتارىن بىلەتىن اتتارىن ءومىرى ەستىمەگەن ءدىني اعىمدار قاپتاپ كەلدى. ولار كەلىپ قانا قويماي قازاق قوعامىنىڭ بولشەكتەۋگە ءوز كۇشتەرىن سالا باستادى. مىسالى سوڭعى رەسمي مالىمەتتەرگە سۇيەنسەك ەلدەگى سالافيتتەر سانى 15 مىڭنان اسىپ جىعىلىپتى، بۇل ۇلكەن كۇش ولارمەن كۇرەسۋ كەرەك دەپ شۋلاپ جۇرگەندە، «يەگوۆا كۋاگەرلەرى» 17 مىڭ قازاقستان ازاماتىنىڭ ساناسىن ۋلاپ، ەلىمىزدىڭ تۇكپىر، تۇكپىرىندە 60-تان استام بولىمشەسىن اشىپ ۇلگەرگەن. بۇگىن ءداستۇردى جوققا شىعارىپ جۇرگەن تەك وزدەرىنىڭ ويدان شىعارعان قاعيدالارىنا عانا باعىناتىن قالىڭ توپ ءبىر-بىرىمەن جاۋلاسىپ، كۇش كورسەتپەسىنە كىم كەپىل. ارينە قۇداي ونىڭ بەتىن ارى قىلسىن بىراق، ءدال سونداي جاعداي ورىن الاتىن بولسا، كىنانى قازىرگىدەي سىرتقى كۇشتەرگە جابا الماي قالامىز. ول كەزدە كىنالىنى ىزدەۋدىڭ ءوزى كەش بولادى. ال بۇنداي ءدىني ۇيىمدار ەلىمىزدە وتە كوپ، ولارعا قانشا ادام كىرىپ كەتكەنىن ءدوپ باسىپ ايتۋ قيىن. ءبىر عانا الماتى قالاسىنىڭ وزىندە 115 ءدىني ۇيىم تىركەلگەن ەكەن ال ونى بۇكىل رەسپۋبليكاعا شاشىپ كەپ جىبەرسەڭىز قانداي ساندار شىعاتىنىن كوز الدىڭىزعا ەلەستەتە بەرىڭىز. 17 ميلليوننان ءسال عانا استانىن حالقى بار ەلگە وسىنشاما ءدىندارلاردى كىرگىزۋدىڭ قانشالىقتى قاجەتتىلىگى بولدى. الدە قازاققا قۇدايدى تانۋ ءۇشىن الەمنىڭ بار ءدىنىن تايراڭداتىپ قويۋ كەرەك پە ەلىندە؟. سۇراق كوپ، جاۋاپ جوق...
قازىر قاي جەردى اشىپ قالساڭدا مەيلى ول تۆ، گازەت، جۋرنال، راديو، سايت، الەۋمەتتىك جەلى بولسىن بارلىق جەردە قمدب-دان باستاپ، كۇشتىك قۇرىلىمدارعا دەيىن تەك ءبىر ىسپەن اينالىسىپ جاتىر. ول يسلامنىڭ وزگە اعىمدارىنا كىرىپ كەتكەن ادامداردى كەرى ءداستۇرلى يسلامعا قايتارۋ. ءيا بۇل قۇپتارلىق دۇنيە، كەش بولسادا وتە ورىندى جۇمىس. بىراق، جوعارىدا ايتىلىپ كەتكەن 17 مىڭ يەگوۆا كۋاگەرلەرىن كىم، قاشان، اتا دىنىمەن قازاقى سالتىنا قايتارادى؟ الدە مىندەتتى تۇردە اقتوبەدا اتىسىپ، سۇرياعا بارىپ سوعىسقاندارىن كۇتۋ كەرەك پە؟ ساقالىن ساپسيتىپ، بالاعىن شورت كەسىپ، قىمتانىپ ورانعاندارمەن قاتار، ۇستىنە ءۇندىنىڭ ءساريىن كيىپ، ماڭدايىنا بوياۋىن جاعىپ، سيىرعا تابىنىپ، شىركەۋدە ءان ايتىپ جۇرگەن قانشاما قازاق ءجۇر بۇل ەلدە. ءبارىن ايتتا، ءبىرىن ايت ءبىزدىڭ بيلىككە جوعارىدا اتالعان ءدىني ۇيىمدارمەن «جارانىڭ جارىلعانىن» كۇتپەي، كۇرەستى قازىردەن باستاعان دۇرىس شىعار. قۇدايسىز كسرو-دان قۇتىلعاندا كوپ قۇدايلى قازاقستان قۇرىپ الماۋدىڭ قامىن ويلاۋ كەرەك. رۋحاني جاڭعىرۋدان بۇرىن، رۋحاني قاڭعىرۋدان ساقتانعان ابزال.
"The Qazaq Times"
