امەريكالىق Associated Press (AP) جاڭالىقتار اگەنتتىگى پرەزيدەنت قاتىساتىن شاراعا كىرگىزبەگەنى ءۇشىن دونالد ترامپ اكىمشىلىگىندەگى ءۇش شەنەۋنىكتىڭ ۇستىنەن سوتقا ارىز ءتۇسىردى. اگەنتتىك ءوز تىلشىلەرىنە ءباسپاسوز جيىندارىنا قاتىسۋعا رۇقسات بەرۋدى، شەنەۋنىكتەردىڭ بۇل ارەكەتىن ءباسپاسوز ەركىندىگىن بۇزۋ دەپ تانۋدى جانە كەلتىرىلگەن شىعىندى وتەۋدى تالاپ ەتىپ وتىر.

داۋدىڭ ءمانى نەدە؟

اقپان ايىندا اق ءۇي AP جۋرناليستەرىنە پرەزيدەنت قاتىساتىن ءىرى شارالارعا قاتىسۋعا تىيىم سالعان بولاتىن. ادەتتە پرەزيدەنتتىڭ كابينەتى، ۇشاعى جانە ترامپتىڭ فلوريداداعى جەكە رەزيدەنتسياسى سەكىلدى ورىندارعا جۋرناليستەر كىرگىزىلەتىن. الايدا، بۇل شەكتەۋدىڭ ەنگىزىلۋىنە AP اگەنتتىگىنىڭ مەكسيكا شىعاناعىنىڭ جاڭا اتاۋىن پايدالانۋدان باس تارتۋى سەبەپ بولعان.
قاڭتار ايىندا دونالد ترامپ مەكسيكا شىعاناعىن "امەريكالىق شىعاناق" دەپ اتاۋ تۋرالى جارلىق شىعارعان ەدى. بىراق AP اگەنتتىگى تاريحي اتاۋدى پايدالانۋدى جالعاستىرىپ، تەك ۆاشينگتوننىڭ جاڭا اتاۋ تۋرالى ۇستانىمىن ەسكەرتۋگە عانا كەلىسكەن. وسى جاعدايدان كەيىن اگەنتتىك تىلشىلەرى پرەزيدەنت قاتىساتىن شارالارعا كىرە الماي قالدى.

AP نە تالاپ ەتىپ وتىر؟

AP اگەنتتىگى ۆاشينگتونداعى ايماقتىق سوتقا شاعىم ءتۇسىردى. قۇجاتتا "اقش-تاعى ءباسپاسوز جانە بارلىق ازامات ۇكىمەتتىڭ قىسىمىنان قورىقپاي ءسوز ورامىن تاڭداۋعا قۇقىلى" دەلىنگەن. اگەنتتىك بۇل ارەكەتتى كونستيتۋتسياعا قايشى دەپ اتاپ، سوتتىڭ بۇل ماسەلەنى كەڭەيتىلگەن سوت القاسىندا قاراۋىن سۇرادى.

اق ءۇيدىڭ جاۋابى

ترامپ اكىمشىلىگى AP-ءدىڭ بۇل ارەكەتىن "اقىلعا قونىمسىز" دەپ باعالادى. اق ءۇيدىڭ كوممۋنيكاتسيا جونىندەگى ديرەكتورى ستيۆەن چۋنگ AP جۋرناليستەرىن "يدەولوگياعا ۇشىراعان" تىلشىلەر دەپ اتادى. ول اكىمشىلىكتىڭ بۇل ىستەن جەڭىلمەيتىنىنە سەنىمدى ەكەنىن مالىمدەدى.
دەگەنمەن، 20 اقپاندا پرەزيدەنت ترامپ رەسپۋبليكالىق گۋبەرناتورلارمەن كەزدەسۋ بارىسىندا سوتتا جەڭىلۋى مۇمكىن ەكەنىن مويىندادى، بىراق بۇل "ماڭىزدى ەمەس" ەكەنىن ايتتى.

ءباسپاسوز ەركىندىگىنە اسەرى

بۇل وقيعا اقش-تاعى ءباسپاسوز ەركىندىگى ماسەلەسىنە قاتىستى ۇلكەن تالقىلاۋ تۋعىزدى. ساراپشىلار بۇل جاعداي جۋرناليستەرگە قىسىم كورسەتۋ ارەكەتى رەتىندە قاراستىرىلۋى مۇمكىن ەكەنىن العا تارتادى. ەگەر سوت AP-ءدىڭ پايداسىنا شەشىم شىعارسا، بۇل ءباسپاسوز وكىلدەرىنىڭ قۇقىعىن قورعاۋدا ماڭىزدى پرەتسەدەنتكە اينالۋى مۇمكىن.
كەلەسى سوت تىڭداۋىنىڭ ناقتى ۋاقىتى ءالى بەلگىلەنگەن جوق.