سولتۇستىك كورەيادا امەريكالىق ازامات تۇتقىندالىپ، ەكى ەل قاتىناسى ۋشىقتى

وڭتۇستىك كورەيا  «Yonhap» اقپاراتتىق اگەنتتىگى اتىن اتاعىسى كەلمەگەن اقپارات اگەنتتىنىڭ بەرگەن حابارىنا سىلتەمە جاساپ، سولتۇستىك كورەيا جاعى پيوڭياڭ (پحەنيان) حالىقارالىق اۋەجايىندا ەلدەن شىعىپ كەتۋگە تىرىسقان امەريكالىق ازاماتتى تۇتقىنداعان. امەريكالىق تانىمال باسىلىمداردىڭ ايتۋىنشا، بۇل ەكى ەل اراسىنداعى شيەلەنىستىڭ وشاعىن ءتىپتى دە قىزدىرا تۇسەتىن ارەكەت.

«Korea Times» باسىلىمىنىڭ حابارىنا قاراعاندا، سولتۇستىك كورەيا جاعىنان كۇدىكتى رەتىندە قولعا الىنعان 50 جاستاعى امەريكالىق ەر ادامنىڭ اتى توني كيڭ، كورەي تىلىندەگى ەسىمى كيم ساڭ داك. كورەيادا تۋىلعان امەريكا ازاماتى. وسىعان دەيىن تەرىستىك كورەي ەلىندە ءبىلىم بەرۋمەن اينالىسقان.

CNN  ارناسى 24 ءساۋىر كۇنى سولتۇستىك كورەياداعى شۆەتسيا ەلشىلىگىنىڭ وكىلى ايتقان سوزگە سىلتەمە بەرگەن. ايتالىق: «ءبىز 22 ءساۋىر كۇنى تۇتقىندالعان امەريكالىق ازامات تۋرالى الدەقاشان حابارلاما الدىق. وعان پيوڭياڭنان ۇشىپ كەتۋگە تيىم سالىپتى. الايدا، بۇل تۋرالى ءبىز ەشقانداي تۇسىنىكتەمە تاپسىرىپ العامىز جوق»، – دەگەن.

سولتۇستىك كورەيا مەن اقش اراسىندا ەشقانداي ديپلوماتيالىق قارىم-قاتىناس ورناماعان.  2009 جىلدان بەرى قاراي 10 امەريكالىق جانە وزگە ەل ازاماتى سولتۇستىك كورەيا جەرىندە كۇدىكتى رەتىندە قولعا الىنعان.

سەۋلدەگى دۇنيەجۇزىلىك عىلىمي زەرتتەۋ ورتالىعىنىڭ مەڭگەرۋشىسى سول كۇنى پىكىر ءبىلدىرىپ: «كورەي تۇبەگى شيەلەنىسى ۋشىعىپ تۇرعان جاعدايدا، قحدر-نىڭ بۇل ارەكەتى وتقا ماي قۇيعانمەن بىردەي»، – دەدى.  اقش-تاعى “The New York Times” باسىلىمى بۇل تۋرالى: «سولتۇستىك كورەيا تاريحتان بەرى شەتەلدىكتەردى تۇتقىنعا الىپ، ولاردى ديپلوماتيالىق قارۋ رەتىندە پايدالانىپ كەلەدى»، – دەپ جازدى.

بۇل سولتۇستىك كورەيا كەيىنگى ۇكىمەتى جاعىنان تۇتقىندالعان 3-ءشى امەريكالىق ازامات. بۇدان بۇرىنعى ەكەۋى: ساياسي ۇگىت-ءناسيزحات تاراتتى دەپ ايىپتالعان 22 جاستاعى كوللەدج ستۋدەنتى ۋاببيل، وتكەن جىلى ناۋرىز ايىندا 15 جىلعا «ەڭبەكپەن تاربيەلەۋ» الاڭىنا جىبەرىلدى; 62 جاستاعى كورەيادا تۋىلعان امەريكا ازاماتى كين دوك جەگە تىڭشىلىق ايىپ تاعىلىپ، وتكەن جىلى ءساۋىر ايىندا 10 جىلعا سوتتالعان. بۇدان تىس كورەيا-كانادا ازاماتى حەن سۋ ليم دە وسىعان ۇقساس ايىپپەن قاماۋعا الىنعان بولاتىن.

The Qazaq Times