قىركۇيەكتىڭ التىسىنا قازاقستان پرەزيدەنتىنىڭ ءباسپاسوز حاتشىسى قىزمەتىنە تاعايىندالعان نۇرمۇحامەد بايعاراەۆ قىزمەتىنەن بوسدى. بۇل تۋرالى ول ءوزىنىڭ Facebook پاراقشاسىندا حابارلادى.

كۇنى كەشە عانا استانادا پرەزيدەنت توقاەۆتىڭ ۇلتتىق قۇراما مۇشەلەرەرىن جەڭىستەرىمەن قۇتتىقتاپ جۇرگەن فوتولارىن سالعان بايعاراەۆ قىزمەتتەن بوساۋىن ءوزىنىڭ دەنساۋلىعىمەن بايلانىستى ەكەنىن وقابىلدانعان شەشىم ەكەنىن ايتقان.

"باسشىلىق جاعدايدى ءتۇسىندى" دەگەن جاپ-جاڭا جاۋاپتى حاتشى: "كەشە دەنساۋلىعىما قاتىستى وقىس جاعدايدان سوڭ (پريستۋپتار) دارىگەرلەرگە تەكسەرىلۋگە ءماجبۇر بولدىم. تولىق تەكسەرىستەن كەيىن سىرقاتتىڭ بەلگىسى بايقالدى. دارىگەرلەر ۇزاقمەرزىمدى ەم-دومدى بىردەن باستاۋدى، ونى تۇراقتى قابىلداۋدى جانە باستىسى – ۇشاقپەن ۇشۋدى بەلگىلى ءبىر ۋاقىتقا دەيىن توقتاتۋدى تالاپ ەتتى. مەديتسينالىق تالاپ قازىرگى قىزمەتىمدى تولىققاندى اتقارۋعا كەدەرگىسىن كەلتىرەتىنى بەلگىلى. سەبەبى ايماقتارعا جانە شەتەلدەرگە ءىس-ساپارلار تۇراقتى تۇردە بولادى. بۇل – ءجيى ۇشاقپەن ۇشۋ دەگەن ءسوز. شىنى كەرەك، مۇندايدى ءوزىم دە كۇتپەدىم. جوسپار باسقاشا ەدى. وتكەن اپتادا كىرىسكەن قىزمەتىمە بىلىمىممەن، بىلىكتىلىگىممەن دايىن ەدىم. ءباسپاسوز قىزمەتىن جەتىلدىرۋگە، ودان ءارى اشىق ەتۋگە قاتىستى بىرنەشە يدەيا، باستامالارىم بار ەدى" -دەگەن پوست جاريالاعان.

نۇرمۇحامەد بايعاراەۆ قاسىم-جومارت توقاەۆتىڭ بۇرىنعى ءباسپاسوز حاتشىسى رۋسلان جەلدىبايدىڭ ورىنباسارى بولعان. ونىڭ الدىندا قازاقستاندى شيرەك عاسىر باسقارعان نۇرسۇلتان نازارباەۆ قۇرعان "نۇر وتان" پارتياسىنىڭ (قازىرگى "امانات" پارتياسى) ءۇنى - "ايقىن" گازەتىنىڭ باس رەداكتورى قىزمەتىن اتقارعان. بيىل قىركۇيەكتە پرەزيدەنت اكىمشىلىگىندەگى وزگەرىستەر كەزىندە پرەزيدەنتتىڭ ءباسپاسوز حاتشىسى قىزمەتىنە تاعايىندالعان.