5 قىركۇيەك كۇنى قازاقستان پرەزيدەنتى قاسىم-جومارت توقاەۆتىڭ جارلىعىمەن مارات احمەتجانوۆ اقمولا وبلىسىنىڭ، ەربول قاراشوكەەۆ جامبىل وبلىسىنىڭ اكىمى بولىپ تاعايىندالدى. بۇل تۋرالى ورتالىق ازيا جاڭالىقتار قىزمەتى جازدى.

58 جاستاعى مارات احمەتجانوۆ 2022 جىلعى اقپاننان بەرى ىشكى ىستەر مينيسترلىگىن باسقارعان. ول توقاەۆتىڭ 1 قىركۇيەكتەگى جولداۋىنان كەيىن قىزمەتىنەن بوساعان.

احمەتجانوۆ 2021 جىلدىڭ ساۋىرىنەن سىبايلاس جەمقورلىقپەن كۇرەس ءىس-قيمىل اگەنتتىگىنىڭ باسشىسى بولدى. ودان الدىن 2016-2021 جىلدار ارالىعىندا باس پروكۋروردىڭ ورىنبارى بولعان.

حالىقارالىق بايقاۋشىلار قازاقستاندى پوليتسەي مەملەكەتكە جاتقىزادى. مينيسترلىك قۇرامىندا قاتارداعى پوليتسەيلەردەن بولەك ۇلتتىق ۇلان مەن ىشكى اسكەر بار. ەلدەگى نارازىلىق جيىندارىندا جاپپاي ۇستاۋدى دا وسى ىشكى ىستەر مينيسترلىگىنە قاراستى جاساقتار جۇزەگە اسىرادى. جازالاۋ مەكەمەلەرى دە وسى مەكەمەگە قارايدى. قۇقىق قورعاۋشىلار قاماۋ ورىندارىندا سوتتالۋشىلاردىڭ قۇقىعى ءجيى تاپتالاتىنىن، ءتىپتى ازاپتاۋعا ۇشىرايتىنىن ايتادى. مينيسترلىك بۇل ماسەلەسىمەن كۇرەسىپ جاتقانىن ايتقانىمەن، ازاپتاۋ شاعىمدارى ازايماي تۇر.

جامبىل وبلىسىنا اكىم بولىپ تاعايىندالعان ەربول قاراشوكەەۆ وسىعان دەيىن اۋىل شارۋاشىلىعى مينيسترلىگىن باسقارعان. بۇل مەكەمە قازاقستاندا ەڭ ءجيى سىنعا ۇشىرايتىن مينيسترلىكتەر قاتارىندا. بيىل كوكتەمدە توقاەۆ بۇل مينيسترلىكتى ءوزى دە سىناعان.

"اۋىل شارۋاشىلىعى جانە ءوندىرىس سالاسىنىڭ دامۋىندا ناقتى ناتيجە جوق. ازىق-تۇلىك ينفلياتسياسىنىڭ باستى سەبەبى دە – وسىندا. ەلىمىزدە وندىرىلەتىن تاۋاردىڭ كولەمى ىشكى سۇرانىستى قامتاماسىز ەتۋگە جەتپەيدى. يمپورتقا تاۋەلدىمىز" دەدى ول ساۋىردە وتكەن ۇكىمەت وتىرىسىندا.

بۇعان دەيىن ەربول قاراشوكەەۆ قارجى ءمينيسترىنىڭ ورىنباسارى بولعان جانە پرەزيدەنت اكىمشىلىگىندە قىزمەت اتقارعان، "قازاگرو" مەملەكەتتىك حولدينگىندە باسقارما توراعاسى لاۋازىمىندا بولعان. بۇل حولدينگ اۋىل شارۋاشىلىعى سالاسىنداعى ميللياردتاعان تەڭگە قارجى بولىنگەنىمەن ىسكە اسپاي، شىعىنعا ۇشىراعان جوبالارى ءۇشىن تالاي رەت سىنعا قالعان.

قاراشوكەەۆ باسقارعالى وتىرعان جامبىل وبلىسى بيىل قۇرعاقشىلىقتان قاتتى زارداپ شەگىپ وتىر. قىرعىزستاننان كەلەتىن سۋ ازايىپ، شارۋالار شىعىنعا باتىپ وتىر.

سونداي-اق، قازاقستان پرەزيدەنتى بۇگىن ەكولوگيا جانە تابيعي رەسۋرستار ءمينيسترىن دە تاعايىندادى. بۇل قىزمەتكە ەرلان نىسانباەۆ كەلدى. وسىعان دەيىن ول استانا اكىمىنىڭ كەڭەسشىسى بولعان. مينيسترلىكتى وسىعان دەيىن باسقارعان ءزۇلفيا سۇلەيمەنوۆا بيىل سەمەي وبلىسىنداعى ءورت كەزىندە سىنعا قالعان.