اباي وبلىسىنداعى ورمان ورتىنە بايلانىستى قوزعالعان ءىس اياسىندا جاۋاپتى ادامداردىڭ بارلىعى تەرگەلەدى. باس پروكۋروردىڭ ورىنباسارى جاندوس ومىراليەۆ وسىنداي مالىمدەمە جاسادى.

ومىراليەۆ مىرزانىڭ سوزىنشە، اباي وبلىسىنداعى ورمان ورتىنە بايلانىستى ەكى باپ – «ەكى نەمەسە ودان دا كوپ ادامنىڭ ولىمىنە الىپ كەلگەن ءورت قاۋىپسىزدىگى ەرەجەلەرىن ساقتاماۋ» جانە «سالعىرتتىق» بويىنشا قىلمىستىق ءىس قوزعالعان. قازىر ەكى ءىستى دە پروكۋراتۋرا تەرگەپ جاتىر.

جاندوس ومىراليەۆتىڭ ايتۋىنشا، وسى ءىس بويىنشا الداعى ۋاقىتتا شىعىس قازاقستان وبلىسىنىڭ اكىمى دانيال احمەتوۆ، اباي وبلىسىنىڭ اكىمى نۇرلان ۇرانحاەۆ، بۇرىنعى توتەنشە جاعداي ءمينيسترى يۋري يلين، ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا تەرگەلەدى.

– قازىر ەكى ءىستى باس پروكۋراتۋرا تەرگەپ جاتىر. تەرگەۋ اياسىندا ءوز مىندەتىنە سالعىرت قاراعان، سونىڭ ناتيجەسىندە ارەكەتى قايعىلى وقيعاعا سەبەپ بولعان لاۋازىمدى تۇلعالاردىڭ بارلىعى انىقتالادى. لاۋازىمدى تۇلعالاردىڭ ارەكەتىنە ازىرگە باعا بەرىلگەن جوق. بارلىعى جاۋاپقا تارتىلادى، – دەدى ومىراليەۆ.

اباي وبلىسىنداعى ورمان ءورتى سالدارىنان 15 ادام قازا تاۋىپ، 60 مىڭ گەكتار جەردى جالىن شارپىعان. ءورت ءالى تولىق سوندىرىلگەن جوق.