پوليتسيا "جۋرناليستەرگە شابۋىل ۇيىمداستىرعان" كۇدىكتىنى ۇستاعانىن حابارلادى. بۇل تۋرالى ازاتتىق راديوسى جازدى.

پوليتسيانىڭ ايتۋىنشا، كۇدىكتىنىڭ اتى-ءجونى – اركادي سەرگەەۆيچ (مانەۆيچ) كلەبانوۆ. قازاقستان ازاماتى. "كىناسىن مويىنداعان" كۇدىكتى سوت سانكتسياسىمەن "قاماۋعا الىنعان".

وعان قىلمىستىق كودەكستىڭ "قوقان-لوقى", "جەكە ومىرگە قول سۇعۋ", "بىرەۋدىڭ مۇلكىن جويۋ", "بۇزاقىلىق", "جۋرناليستەردىڭ كاسىبي قىزمەتىن اتقارۋعا كەدەرگى كەلتىرۋ" باپتارى بويىنشا ايىپ تاعىلعان.

تەرگەۋ كەزىندە كۇدىكتى "شابۋىلىنىڭ ءمانىن" بىرقاتار باق-قا بۇرىننان "قىساستىعىم بولعانىنان" دەپ تۇسىندىرگەن. پوليتسيانىڭ بولجامىنشا، ول "حاكەرلەردى جالداپ", "شابۋىلدى ورىندايتىنداردى" ىزدەگەن. "ورىنداۋشىلارعا اقىنى كريپتوۆاليۋتا ارقىلى تولەپ وتىرعان".

قازاقستاندا شابۋىلعا ۇشىراعان جۋرناليستەردىڭ كەيبىرى ءبىر كۇن بۇرىن وزدەرىن پوليتسياعا شاقىرىپ جاتقانىن، "تاپسىرىس بەرۋشىمەن" كەزدەستىرەتىنىن حابارلاعان ەدى. كەيبىرى بارۋدان باس تارتقان.

"ۆلاست" باسىلىمى كۇدىكتى قازاقستاندىق وليگارحتىڭ جاقىنى ەكەنىن، ول تۋرالى ماقالالار بۇرىن شىققاندىقتان، ونىڭ باق-قا "وشتەسۋى سەبەبى" بەلگىسىز كۇيدە قالعانىن جازدى.

وسى اپتادا ءىىم جۋرناليستەرگە "شابۋىل ۇيىمداستىرۋشى" ۇستالعانىن، ونىڭ ء"تورت سىبايلاسى" انىقتالعانىن حابارلاعان. بەسەۋى دە وزگە ەلدىڭ ازاماتى دەپ ايتىلادى.

ونىڭ الدىندا مينيسترلىك الماتى مەن استانادا "جۋرناليستەرگە شابۋىل جاسادى" دەگەن كۇدىكپەن 18 ادام ۇستالعانىن حابارلاعان.

قازاقستاندا كەيىنگى كەزدە جۋرناليستەرگە شابۋىل جيىلەدى. شابۋىلعا ۇشىراعان جۋرناليستەر بۇل وقيعالار كاسىبي قىزمەتىمىزگە بايلانىستى دەپ ەسەپتەيدى.

  • 22 اقپاندا جۋرناليست دانيار مولدابەكوۆ ءوزىن مەديتسينالىق ماسكا تاققان بىرەۋ الماتىداعى ءۇيىنىڭ پودەزىندە ۇرىپ كەتكەنىن حابارلادى. "5 قاڭتار" تەلەگرام-ارناسىنىڭ اۆتورى، قازاقستانداعى نارازىلىقتار تۋرالى جازاتىن مولدابەكوۆ شابۋىلدى ءوزىنىڭ كاسىبي قىزمەتىمەن بايلانىستىرادى.
  • 20 اقپانعا قاراعان ءتۇنى الماتىدا جۋرناليست، "گيپەربورەي" YouTube-ارناسىنىڭ اۆتورى ۆاديم بورەيكومەن جۇمىس ىستەيتىن بەينەوپەراتور رومان ەگوروۆتىڭ ەكى اۆتوكولىگىن بىرەۋلەر ورتەپ كەتتى. ەگوروۆ زاڭسىز ارەكەتتىڭ كاسىبي قىزمەتىمە قاتىسى بار دەپ وتىر. ونىڭ الدىندا ۆاديم بورەيكو بەلگىسىز بىرەۋلەر پاتەر ەسىگىنىڭ سىرتقى جاعىنا قۇرىلىسقا ارنالعان كوبىك جاعىپ كەتكەنىن حابارلاعان.
  • 8 اقپاندا Ulysmedia.kz جاڭالىقتار سايتىنىڭ باس رەداكتورى سامال يبراەۆا استانادا بىرەۋلەر رەداكتسياعا شيكى ەت پەن بالالارىنىڭ سۋرەتى سالىنعان قوراپ بەرىپ جىبەرگەنىن حابارلاعان. يبراەۆا وقيعانى "قورقىتۋ" دەپ باعالاعان. ونىڭ الدىندا ول بەلگىسىز بىرەۋلەر سايتتى بۇزىپ، وعان ءوزىنىڭ جانە وتباسى مۇشەلەرىنىڭ جەكە مالىمەتتەرىن جاريالاعانىن ايتقان.
  • 5 قاڭتاردا الماتىلىق جۋرناليست دينارا ەگەۋباەۆا بەلگىسىز بىرەۋلەر اۆتوكولىگىنىڭ سالونىنا كىرپىش لاقتىرىپ، ماشيناسىن ورتەپ جىبەرگەنىن حابارلادى. ەگەۋباەۆا مۇنداي ارەكەتتى قاستاندىق دەپ سيپاتتادى. ەكى كۇننەن سوڭ الماتى پوليتسياسى كامەلەت جاسىنا تولماعان بەس كۇدىكتىنى ۇستاعانىن حابارلادى. 15, 16 جانە 17 جاستاعى كۇدىكتىلەر Elmedia رەداكتسياسىنىڭ ەسىگىن دە بۇزدى دەگەن كۇدىككە ىلىنگەن.
  • 24 اقپاندا "جۋرناليستەردى قورعاۋ كوميتەتى" (Committee to Protect Journalists, CPJ) قازاقستان بيلىگىن "جۋرناليستەرگە شابۋىلدىڭ جاڭا تولقىنىن" زەرتتەپ، كىنالىلەردى جاۋاپقا تارتۋعا ۇندەگەن.