قىتاي بيلىگى رەسەيگە ۋكرايناداعى سوعىستا قولداناتىن قارۋ بەرۋ ماسەلەسىن قاراستىرىپ جاتىر. بارلاۋ دەرەكتەرىنە سۇيەنگەن امەريكا ورتالىق بارلاۋ قىزمەتىنىڭ (تسرۋ) ديرەكتورى ۋيليام بەرنس وسىلاي دەپ مالىمدەدى. ونىڭ سوزىنشە، الايدا پەكين تۇپكىلىكتى شەشىم قابىلداماعان. بەرنس بۇل ءسوزىن CBS News تەلەارناسىنا بەرگەن سۇحباتىندا ايتتى. بۇل تۋرالى ازاتتىق راديوسى جازدى.

قىتاي رەسەيگە قارۋ-جاراق پەن وق-ءدارى بەرۋگە كەلىسەيىن دەپ جاتقانىن بۇعان دەيىن باتىس اقپارات قۇرالدارى دا، ونىڭ ىشىندە CNN, Financial Times, Spiegel حابارلاعان. وتكەن اپتادا اقش مەملەكەتتىك حاتشىسى ەنتوني بلينكەن "ۆاشينگتون بۇعان قارسى جانە پەكين ماسكەۋگە قارۋ بەرسە، سالدارى بولادى" دەپ ەسكەرتكەن.

CBS News-ءتىڭ جازۋىنشا، دجو بايدەن مەن ۋيليام بەرنستىڭ ءوزى اقپان باسىندا عانا جاعدايعا باسقاشا باعا بەرگەن. ولار سول كەزدە قىتاي رەسەيگە قارۋ بەرۋ يدەياسىنا سالقىن قارايتىنىن ايتقان.

بەرنستىڭ ايتۋىنشا، قازىر اقش-تا قىتاي رەسەيگە قارۋ-جاراق بەرگەنىنە دالەل جوق. تسرۋ باسشىسىنىڭ ايتۋىنشا، امەريكا بيلىگى كەيىنگى كەزدە وسى تاقىرىپتى قوزعاپ، قىتايدى قارۋ بەرۋدەن باس تارتۋعا كوندىرۋگە تىرىسىپ جاتىر.

اقش بىلتىر رەسەيگە ۋكرايناعا باسقىنشىلىقتىڭ سالدارى تۋرالى ەسكەرتكەن. ول كەزدە ۆاشينگتون ۆلاديمير ءپۋتيندى باسقىنشىلىقتان باس تارتۋعا كوندىرە الماعان ەدى.