دۇيسەنبى، 23 قاڭتاردا ءبىر توپ بەلسەندى الماتى قالاسىنىڭ پروكۋراتۋراسىنا جينالىپ، باس پروكۋرور بەرىك اسىلوۆتىڭ قىزمەتىنەن كەتۋىن تالاپ ەتتى، -دەپ جازدى ازاتتىق راديوسى.

"ەلدەگى زاڭدىلىقتىڭ ساقتالۋىن قاداعالايتىن ورگاننىڭ باسشىسى بەرىك اسىلوۆ مۇعالىم قالاس نۇرپەيىسوۆ پەن جۋرناليست ايگەرىم تىلەۋجاندى ء"دىني ەكسترەميستىك ۇيىمداردىڭ مۇشەلەرى" دەگەنىن ءبارىمىز ەستىدىك. سوتى بولماي، ۇكىم شىقپاي تۇرىپ ەكەۋى جايلى ءماجىلىس قابىرعاسىندا، دەپۋتاتتاردىڭ الدىندا ايتقانى ارقامىزعا ايازداي باتتى. بۇل – پروكۋروردىڭ ءوزىنىڭ زاڭدى ورەسكەل بۇزعانى، سول ءۇشىن ونىڭ قىزمەتىنەن كەتۋىن تالاپ ەتەمىز" دەدى پروكۋراتۋرا الدىنا بارعان جۋرناليست دۋمان مۇحاممەدكارىم.

جينالعاندار وسىدان ءۇش كۇن بۇرىن، 20 قاڭتاردا "باس پروكۋرور بەرىك اسىلوۆ قىزمەتىنەن كەتسىن" دەگەن ونلاين پەتيتسيا جاريالاعان. قازىر وعان 130-تان اسا ادام قول قويعان، قالالىق پروكۋراتۋرا الدىنا جينالعاندار سول جەردەن دە قول جينادى.

"وسى جەرگە جينالعان 30-دان استام ادام قول قويدى. ونلاين پەتيتسيا ءسال قيىنداۋ، ەلەكترون پوشتا ارقىلى، Facebook ارقىلى تىركەلۋ كەرەك. سونداي شارتتارىنا بايلانىستى ونلاين قول قويۋشىلار سانى ازىرiە اسا كوپ ەمەس. بىراق بارلىق ازاماتتىق قوعام بۇل پەتيتسيانى قولداپ جاتىر" دەدى جينالعانداردىڭ ءبىرى، بەلسەندى ارايلىم نازاروۆا.

جينالعاندار شامامەن ءبىر ساعاتتان سوڭ تارادى. پەتيتسيانى پرەزيدەنت اكىمشىلىگىنە پوشتا ارقىلى جانە ەلەكتروندى ءوتىنىش تۇرىندە جىبەرەتىنىن ايتتى. ولارمەن سويلەسۋگە پروكۋراتۋرادان ەشكىم شىققان جوق.

جۋرناليست ايگەرىم تىلەۋجان 2022 جىلعى قاراشادا قاڭتار وقيعاسى بايلانىستى كۇدىكتى رەتىندە سوت شەشىمىمەن ۇيقاماققا الىنعان. بىرنەشە اي بويى ونى "الماتى اۋەجايىن باسىپ الماق بولعاندار ءىسى بويىنشا" قىلمىستىق ىسكە كۋاگەر رەتىندە تارتىپ، كەيىن كۇدىكتى ساناتىنا اۋىستىرعان.

"اۋەجايدى باسىپ الماق بولدى" دەگەن كۇدىككە ىلىككەندەردىڭ تاعى ءبىرى – تاريح ءپانىنىڭ مۇعالىمى قالاس نۇرپەيىسوۆ. ايگەرىم تىلەۋجان دا، نۇرپەيىسوۆ تە سول كۇنى اۋەجايعا بارعانىن مويىندايدى، بىراق تەرگەۋ تاققان ايىپتاردى جوققا شىعارادى.

قازاقستان كونستيتۋتسياسىنىڭ 77-بابىندا "ادامنىڭ كىنالى ەكەندىگى زاڭدى كۇشىنە ەنگەن سوت ۇكىمىمەن تانىلعانشا، ول جاسالعان قىلمىسقا كىنالى ەمەس دەپ ەسەپتەلەدى" دەپ كورسەتىلگەن.