كەشە الماتىدا پوليتسيا ۇستاعان Oyan, Qazaqstan بەلسەندىلەرى وننان استى. ۇستالعاندار اراسىندا بوتا ءشارىپجان، ميرا وڭعاروۆا، فاريزا وسپان، ناعاشىبەك بەكدايىر، ايدانا ايدارحان، بەيبارىس تولىمبەكوۆ، باۋىرجان ءادىلحانوۆ جانە اسەم جاپىشەۆا بار. كەيبىرىن پوليتسيا – ۇيلەرىنەن، كەيبىرىن جولدان ۇستاپ اكەتكەن. بۇل تۋرالى ورتالىق ازيا جاڭالىقتار قىزمەتى جازدى.

جۇما كۇنى ساعات 12-دەن كەتە بەرە تاۋەلسىزدىك مونۋمەنتىنە بارا جاتقان جولدا بايسەيىتوۆا كوشەسىندە پوليتسيا Oyan, Qazaqstan'نىڭ تاعى ءتورت مۇشەسىن ۇستادى. بۇعان ازاتتىق ءتىلشىسى كۋا بولدى. پوليتسيا ءبىر قىزدىڭ پلاكاتىن تارتىپ العان. “نە ءۇشىن ۇستاپ جاتسىزدار؟” دەگەن سۇراققا پوليتسيا جاۋاپ بەرمەدى.

ازاتتىق ءتىلشىسى پوليتسيادان ازىرگە جاۋاپ الا المادى.

بۇعان دەيىن ميرا وڭعاروۆا الەۋمەتتىك جەلى پاراقشاسىندا ءوزىن "بەيبىت جيىن وتكىزۋ ءتارتىبىن بۇزۋ" (488-باپ 6-بولىگى) بابى بويىنشا ۇستاعانىن جازعان. ول قازىر الماتىنىڭ اۋەزوۆ اۋداندىق پوليتسيا بولىمىندە.

جۇما كۇنى تاڭەرتەڭ پوليتسيا Oyan, Qazaqstan بەلسەندىسى بەيبارىس تولىمبەكوۆتى ۇيىنەن ۇستاپ اكەتكەن ەدى.

جىل سايىن 16 جەلتوقساندا قازاقستاننىڭ ءتۇرلى وڭىرىندە قۇربانداردى ەسكە الۋ شارالارى ءوتىپ، بەلسەندىلەر مەن تۇرعىندار بيلىككە سىن ايتىپ، جەلتوقسان، جاڭاوزەن اقيقاتىن اشۋدى تالاپ ەتىپ كەلەدى. كەمىندە 238 ادامنىڭ ءومىرىن قيعان قاڭتار وقيعاسىنىڭ ءبىر جىلدىعى دا تاياپ كەلەدى. ساراپشىلار وسى ءۇش قانتوگىستىڭ شىندىعى ءالى اشىلمادى دەپ سانايدى.