فوتو: kaztag.kz

پوليتسيا «Elmedia» رەداكتسياسى كەڭسەسىنە «شابۋىل جاسادى» دەپ كۇدىككە ىلىنگەن ەكى ادامدى ۇستاعانىن مالىمدەدى. بۇل جونىندە ازاتتىق راديوسى حابارلادى.

«زاڭعا قايشى ارەكەت جاسادى دەپ كۇدىككە ىلىنگەن ەكى ادام ۇستالدى: ز. ەسىمدى الماتى تۇرعىنى جانە گ. ەسىمدى تارازدان كەلگەن ادام. ەكەۋى دە 18 جاستا» دەپ جازدى Polisia.kz سايتى.

كۇدىكتىلەرگە «ۇساق بۇزاقىلىق» بابى بويىنشا اكىمشىلىك ءىس قوزعالعان. رەسمي اقپارات بويىنشا، ۇستالعاندار «ارەكەتىن مويىنداعان». وقيعاعا قاتىستى وزگە جايتتار انىقتالىپ جاتىر دەپ ايتىلادى.

«Elmedia» رەداكتسياسى كەڭسەسىنە وسىعان دەيىن سوڭعى ءبىر جارىم ايدا ءتورت رەت شابۋىل جاسالعانى حابارلانعان. سوڭعى رەت رەداكتسيا 23 قاراشاعا قاراعان ءتۇنى بەلگىسىز بىرەۋلەر كەڭسەنىڭ ۆيتريناسىن شاعىپ كەتكەنىن حابارلاعان. رەداكتسيا وكىلدەرى وقيعانى «جۋرناليستەرگە ەسكەرتۋ» دەپ باعالاپ، بىراق «كۇرەستى توقتاتپايتىنىن» مالىمدەگەن.

بۇعان دەيىن رەداكتسيا وكىلدەرى ءار وقيعا سايىن پوليتسيا كەلگەنمەن «ەش ناتيجە بولماعانىن» ايتقان.

ءبىر كۇن بۇرىن «ءادىل ءسوز» باسپاسوز قورعاۋ ۇيىمى مەن قازاقستان جۋرناليستەر وداعى پرەزيدەنت قاسىم-جومارت توقاەۆقا قايىرىلىپ، جۋرناليست-ايەلدەردى قورعاۋعا، سونىمەن بىرگە ەلدەگى اقپارات قۇرالدارىنا جاسالعان زاڭسىزدىقتاردى نازاردان تىس قالدىرماۋعا ۇندەگەن ەدى. 

«جالپى بۇۇ ادام قۇقىعى كەڭەسى «جۋرناليستەر قاۋىپسىزدىگى» تۋرالى رەزوليۋتسياسىنا سايكەس ناقتى باعدارلاما قاجەت. جۋرناليستەرگە قارسى زاڭسىزدىق پەن جازاسىزدىق ەلدەگى دەموكراتيالىق رەفورمالاردى تەجەيدى جانە قازاقستاننىڭ قۇقىقتىق جانە دەموكراتيالىق ەل رەتىندەگى بەدەلىنە نۇقسان كەلتىرەدى» دەپ جازىلعان مالىمدەمەدە.

ءباسپاسوز قورعاۋ ۇيىمدارى Elmedia رەداكتسياسىنا جاسالعان شابۋىل مەن جوبا جەتەكشىسى گۇلجان ەرعاليەۆاعا باعىتتالعان بۋللينگ، Orda.kz كەڭسەسىنە جىبەرىلگەن شوشقانىڭ باسى، «دوروجنىي كونترول» تىلشىسى ولەسيا ۆەرتينسكاياعا جاسالعان شابۋىلداردى مىسال رەتىندە كەلتىرگەن.

25 قاراشادا پرەزيدەنتتىڭ ءباسپاسوز حاتشىسى رۋسلان جەلدىباي فەيسبۋكتا «ءادىل ءسوز» حالىقارالىق قورى مەن قازاقستان جۋرناليستەر وداعىنىڭ ايەل-جۋرناليستەردى قورعاۋ تۋرالى ءوتىنىشى نازارعا الىنعانىن حابارلادى.

«بۇقارالىق اقپارات قۇرالدارىنىڭ وكىلدەرىنە قاتىستى زاڭعا قايشى ارەكەتتەر جاساعان ادامداردى جاۋاپقا تارتۋ ءۇشىن بولعان وقيعالاردى تەرگەۋ ءتيىستى مەملەكەتتىك ورگاندارعا تاپسىرىلدى» دەدى رۋسلان جەلدىباي.

قازاقستاندا جۋرناليستەر كاسىبي قىزمەتىنە بايلانىستى توسقاۋىل-كەدەرگىلەرگە ءجيى ۇشىرايدى. «شەكاراسىز تىلشىلەر» حالىقارالىق ۇيىمىنىڭ «ءسوز بوستاندىعى يندەكسىندە» قازاقستان 180 ەلدىڭ اراسىندا 122-ورىندا تۇر. ەلدە ءسوز بوستاندىعىنىڭ احۋالى كۇردەلى دەپ باعالانادى.