فوتو: stan.kz

Human Rights Watch ("حيۋمان رايتس ۆوتچ") حالىقارالىق ادام قۇقىقتارىن قورعاۋ ۇيىمى وزبەكستان قاۋىپسىزدىك كۇشتەرىن 2022 جىلعى 1 جانە 2 شىلدەدە قاراقالپاقستاندا نارازىلىققا شىققانداردى تاراتۋ كەزىندە شامادان تىس كۇش قولداندى دەپ ايىپتادى. بۇل تۋرالى ورتالىق ازيا جاڭالىقتار قىزمەتى جازدى.

ۇيىم وزبەكستان بيلىگىن قاراقالپاقستانداعى وقيعالارعا، سونىڭ ىشىندە قاۋىپسىزدىك كۇشتەرىنىڭ ارەكەتىنە تاۋەلسىز زەرتتەۋ جۇرگىزۋگە شاقىردى.

7 قاراشادا جاريالانعان باياندامادا وزبەكستان قاۋىپسىزدىك كۇشتەرى قاراقالپاقستاندا 2022 جىلعى 1 جانە 2 شىلدەدە بەيبىت شەرۋگە شىققانداردى تاراتۋ كەزىندە ادام ومىرىنە قاۋىپتى قۇرالدار مەن ءىس-ارەكەتتەردى ورىنسىز قولداندى دەپ جازىلعان.

Human Rights Watch مالىمەتىنشە، كۇش قۇرىلىمدارى "وق اتاتىن قارۋ مەن گراناتالاردىڭ بىرنەشە ءتۇرىن" ورىنسىز قولدانعان. قارۋدىڭ مۇنداي تۇرلەرى قاۋىپسىزدىك ەرەجەسىن ساقتاماعان جاعدايدا ادامدى اۋىر جارالاپ نەمەسە ءولتىرۋى دە مۇمكىن، دەلىنگەن باياندامادا. نارازىلىقتى كۇشپەن تاراتۋ كەزىندە كەم دەگەندە 21 ادام، سونىڭ ىشىندە قۇقىق قورعاۋ ورگاندارىنىڭ 4 قىزمەتكەرى ءولدى، 270-تەن استام ادام جارالاندى.

"قاراقالپاقستاندا شىلدەدە كوپتەگەن ادام ءولدى، جۇزدەگەن ادام جارالاندى، ولاردىڭ كەيبىرىنىڭ جاراقاتى اۋىر", – دەيدى Human Rights Watch ۇيىمىنىڭ ەۋروپا جانە ورتالىق ازيا جونىندەگى ديرەكتورى حيۋ ۋيليامسون.

وزبەكستان بيلىگى ازىرگە Human Rights Watch حالىقارالىق ادام قۇقىقتارىن قورعاۋ ۇيىمىنىڭ بايانداماسىنا قاتىستى مالىمدەمە جاساعان جوق.

بيىل شىلدەنىڭ باسىندا قاراقالپاقستان استاناسى نۇكىس پەن وڭىردەگى باسقا دا قالالاردا جاپپاي نارازىلىق شەرۋى بولدى. تۇرعىندار كونستيتۋتسيانىڭ جاڭا نۇسقاسىندا قاراقالپاقستاننىڭ وزبەكستان قۇرامىنان شىعۋ قۇقىعىن بەرەتىن زايىرلى مارتەبەسىن الىپ تاستاعانىنا قارسى شىقتى.

نارازىلىق كۇشپەن باسىلدى. 4 شىلدەدە وزبەكستان بيلىگى 18 ادام قازا بولعانىن، 516 ادام ۇستالعانىن مالىمدەدى. سول كۇنى وزبەكستان پارلامەنتى ەل كونستيتۋتسياسىندا قاراقالپاقستاننىڭ زايىرلى مارتەبەسىن ساقتاۋ جونىندە رەسمي شەشىم قابىلدادى.