جوگوركۋ كەنەشتىڭ 26 قازانداعى وتىرىسىندا دەپۋتاتتاردىڭ بىرقاتارى بىشكەكتە ساياساتكەرلەر مەن بەلسەندىلەردىڭ جاپپاي ۇستالۋىن تالقىلاۋدى ۇسىندى. بۇل تۋرالى ورتالىق ازيا جاڭالىقتار قىزمەتى جازدى.

پارلامەنت دەپۋتاتتارى تولىق مالىمەت الۋ ءۇشىن ءىىم باسشىسىن شاقىرعىسى كەلەدى.

دەپۋتات سەيدبەك اتامباەۆتىڭ پىكىرىنشە، بەلسەندىلەردى جاپپاي ۇستاۋ تۋرالى شەشىم ءادىل ەمەس. "20 ادامدى ۇستادى، ولاردىڭ اراسىندا تانىمال ساياساتكەرلەر، بلوگەرلەر، جۋرناليستەر بار. ءبىزدىڭ بۇل ادامدارمەن ساياسي كوزقاراسىمىز ۇيلەسپەيدى، بىراق ادىلدىك ءۇشىن ايتايىن، ولاردى ۇستاۋ تۋرالى شەشىم ءادىل ەمەس. ەرتەڭ سىزدەرگە بىردەڭە بولسا، بۇل جۋرناليستەردەن قولداۋ كۇتپەڭىز. بيلىك باق پەن جۋرناليستەردىڭ قولداۋىنان ايرىلىپ بارادى. ىشكى ىستەر ءمينيسترىن، ومبۋدسمەندى، جازانى اتقارۋ قىزمەتىن شاقىرايىق. وندا جاعداي جاسالماعان دەپ ەستىدىم. ءبىزدىڭ ولارعا قوياتىن سۇراعىمىز كوپ", - دەيدى اتامباەۆ.

دەپۋتات داستان بەكەشەۆ ارىپتەسىنىڭ ۇسىنىسىن قولداپ، بۇل ماسەلەنى پارلامەنت وتىرىسىندا كوتەرۋ كورەك دەپ مالىمدەدى.

الايدا دەپۋتاتتاردىڭ بىرقاتارى مۇنداي ۇسىنىسقا قارسى شىقتى. "اتا-جۇرت قىرعىزستان" فراكتسياسىنىڭ مۇشەلەرى جەنىشبەك توقتورباەۆ پەن فارحات يسمايلوۆ تەرگەۋ ىسىنە ارالاسۋعا بولمايدى دەپ ەسەپتەيدى.

ۆيتسە-سپيكەر نۇربەك سىدىگاليەۆ تۇستەن كەيىن قۇقىق قورعاۋ ورگاندارىنىڭ وكىلدەرى مالىمەت الۋ ءۇشىن پارلامەنتكە شاقىرتىلاتىنىن ايتتى.

23 قازاندا بىشكەكتە ساياساتكەرلەر، ادام قۇقىقتارىن قورعاۋشىلار مەن بەلسەندىلەردىڭ ءۇيى ءتىنتىلدى. كەيىن 20-دان استام ادام 48 ساعاتقا تەرگەۋ يزولياتورىنا قامالعانى ءمالىم بولدى. ولار كەمپىراباد سۋ قويماسىن قورعاۋ جونىندە كوميتەت قۇرۋ تۋرالى شەشىمنەن سوڭ قۋدالاۋعا ۇشىراعانىن ايتتى.

25 قازانعا قاراعان ءتۇنى بىشكەكتەگى 1-ماي اۋداندىق سوتى 20 ادامدى ەكى ايعا قاماۋعا الۋ تۋرالى شەشىم شىعاردى. ىشكى ىستەر مينيسترلىگى ولاردى "جاپپاي تارتىپسىزدىك ۇيىمداستىرۋعا تالپىندى" دەپ ايىپتاپ وتىر.