تالعار اۋدانىنداعى داۋعا اينالعان N25 گيمنازيا مەكتەبى باستالعالى قوعامنىڭ قىزىۋ تالقىسىندا كەلەدى. وعان سەبەپ اۋەلدە "وقۋ ءتىلى قازاق تىلىندە" دەلىنگەنىمەن ارتىنشا اۋدانداعى اتقا مىنەرلەر مەن ءبىلىم باسقارماسىنداعىلاردىڭ ارنايى ۇيىمداستىرۋىمەن ارالاس بولىپ اشىلىپ تىنعان-دى.

وقۋ ماۋسىمىنىڭ باستالعانىنا اي بولسا دا وقۋشىلاردىڭ جاعدايى جاسالماعان. وعان ءبىلىم بولىمىنەن باستاپ مينسترلىكتە جاۋاپ بەرىپ وتىرعان جوق. اۋەلدە سىنىپ قادلىپتاستىرۋ ستاندارتى 20 دان جوعارى بالا جينالعاندا عانا اشىلادى دەگەن قاعيدا قازاق بالالارىنا عانا ارنالعانداي. ال ورىس سىنىپتارىنداعى بالالار سانى ونشاقتى بولسا دا، سىنىپ ەتىپ ۇستاپ وتىر. اۋداندىق ءبىلىم باسقارماسىنىڭ جۇمىسىنىڭ سىلبىرلىعى سونداي، قۇجاتتارى ءالى راسىمدەلمەگەن. باسقا مەكتەپتەن اۋىسىپ كەلگەن بالالار ەلەكتروندى جۇيەگە ءالى تىركەلمەگەن، ولار ساندا بار، ساناقتا جوق، ەلەكتروندى كۇندەلىكتى ايتپاي-اق قويايىق. ديرەكتوردىڭ ءوزى ءالى تاعايىندالماعان، ديرەكتوردىڭ مىندەتىن ۋاقىتشا اتقارۋشى ورىنداپ وتىر. مەكتەپ قۇجاتى ءالى تولىق دايىن بولماعاندىقتان، اسحانا دا جۇمىس ىستەمەيدى، مەكتەپ ورنالاسقان جەر تالعار قالاسىنىڭ تاۋ جاعىندا بولعاندىقتان، بالالار اس ىشەتىن وزگە اسحانا دا، دۇكەن دە جوق. ول ول ما، ورنالاسقان ورنىنىڭ شالعايلىعىنا بايلانىستى قاتىنايتىن كولىك تە قاراستىرىلماعان. ول رايونعا جاقىن باراتىن 224 باعىتتاعى اۆتوبۋستىڭ ءجۇرۋ جيىلىگى 40 مينۋت، 2 باعىتتاعى اۆتوبۋس تا سونداي. الدا كۇن سۋىتىپ كەلەدى، سوندا بالالار اۆتوبۋس كۇتەمىز دەپ توڭىپ قالماي ما؟ جاقىن اۋىلداردان كەلىپ وقىپ جۇرگەن بالالار ورتالىقتاعى اۆتوبۋس بەكەتىنە دەيىن ءۇش-ءتورت شاقىرىم جاياۋ جۇرۋىنە تۋرا كەلەدى، ۇنەمى تاكسي شاقىرۋعا اتا-انالاردىڭ قالتاسى كوتەرمەيدى، جول بويىنان كەزدەسكەن كولىككە وتىرۋ بالا ءۇشىن قاۋىپتى. اتا-انالاردى ۇنەمى سابىرعا شاقىرىپ كەلە جاتقان مەكتەپ ۇجىمى مەن اۋداندىق، وبلىستىق ءبىلىم باسقارماسىنا شىدامنىڭ دا شەگى بولاتىنىن ۇمىتپاعان ءجون دەگىمىز كەلەدى. بالانىڭ جاعدايى جاسالماسا، ءبىلىم الۋىنا كەدەرگى بولادى، ەلدىڭ بولاشاعى مەن ءۇمىتىن باعالايتىن كەز جەتتى.

بۇل ماسەلە تۋرالى قۇزىرلى ورگاندار اسىرەسە ءبىلىم مينسترلىگى ارنايى قاداعالاسا ەكەن.

الماتى وبلىسى.

ءنۇرباتيما بايتۇرسىن