ۇرىس مايدانىنداعى تۇسكى اسقا ازىرلىك. فوتو: Brendan Hoffman

ءبىر ساتتىك تىنىستاۋدان كەيىن اقىرى باستالدى. دونباسس ءۇشىن قيان-كەسكى ۇرىس باستالدى. بۇل تۋرالى ۋكراينا پرەزيدەنتى ۆولاديرمر زەلەنسكي مالىمدەدى.

كەشە، 18 ساۋىردەن باستاپ رەسەي ۋكراينا قالالارىن اتقىلاۋدى كۇشەيتتى. كيەۆتىڭ ىرگەسىنە دەيىن بارىپ ۋكراينانىڭ ورتالىق قالاسىن الا الماي قايتقان رەسەي كۇشتەرىنىڭ اسكەرلەرىن قايتا ورنالاستىرىپ ەكىنشى اۋقىمدى شابۋىلعا وتەتىنى كوپتەن كۇتىلگەن. ۋكراينا رەسميلەرىنىڭ مالىمدەمەسىندە رەسەيدىڭ الداعى ماقساتى ۋكراينانىڭ فرونتىن ەكىگە ءبولۋ ەكەنىن ايتادى.

رەسەيدىڭ ۋكرايناداعى كوزدەگەن ماقساتى ءىرى قالالارىن باسىپ الىپ، ۇكىمەتتى قۋالاپ، ءوز دەگەنىمەن جۇرەتىن بيلىكتى ورناتۋ ەكەنى بەلگىلى. كيەۆتى الا الماسا دا رەسەي كۇشتەرىنىڭ باس قولباسشىسى «العاشقى اۋقىمدى وپەراتسيا نەگىزگى ماقساتىنا جەتتى» دەپ مالىمدەپ، نەگىزگى كۇشتى دونباسس ايماعىنا شوعىرلاندىراتىنىن اڭعارتقان.

«قايتا شاپقان جاۋ جامان» دەگەندەي، كەزەكتى ارتيللەريالىق جانە زىمىران سوققىلارى ۋكراينانىڭ ونسىزدا قاجىعان قالالارى مەن دالالارىنا وڭاي بولىپ تۇرعان جوق. لۋگانسك، دونەتسك وبلىستارىنداعى كوپتەگەن ءىرى-ۇساقتى قالالاردا قاقتىعىس قىزۋ كۇيگە ءتۇستى.

جەكسەنبىدە رەسەي تارابى مالىمدەمە جاساپ، ۋكراينانىڭ جۇزدەگەن اسكەري نىسانىن، قاتارىندا حاركوۆ، زاپوروجە، دونەتسك جانە دنەپروپەتروۆسك وڭىرلەرىن قامتىعان بارلىعى 16 اسكەري نىساندى جويعانىن مالىمدەدى.

بىراق، كەشە كەشتە ۋكراينا پرەزيدەنتى زەلەنسكي بەينە مالىمدەمەسىندە: «رەسەيدىڭ قىرۋار اسكەري كۇشى توپتالىپ جاتىر، دەگەنمەن قانشا ورىس اسكەرى كەلسە دە ءبىز سوعىسامىز»، – دەدى. ول جانە ۋكراينا قارۋلى كۇشتەرى، ۇكىمەتى ەلدى قورعايتىنىنا ۋادە بەردى.

دونباسس ايماعى – قازىر سوعىستىڭ قىزۋ نۇكتەسى. ەكى تاراپتا وسى ايماققا مول قارۋلى كۇشىن توپتادى. دونباسس ءۇشىن سوعىس باستالماي تۇرىپ تا كوپتەگەن وتاندىق جانە شەتەلدىك ساراپشىلار بۇل ايماقتاعى سوعىستىڭ قيان-كەسكى ءارى قاتال بولاتىنىن بولجاعان ەدى.

The Qazaq Times