تۇركىستاندا بالاباقشا قىزمەتكەرلەرى مەملەكەتتىك قارجىلاندىرۋداعى الالاۋشىلىقا نارازىلىق ءبىلدىردى

بۇگىن، 19 قازاندا تۇركىستان وڭىرىندەگى جەكەمەنشىك بالاباقشالاردىڭ جۇزدەن اسا قىزمەتكەرى بالا باسىنا مەملەكەتتەن بەرىلەتىن قاراجات كولەمىنىڭ ماردىمسىزدىعىنا شاعىنىپ، پرەزيدەنت توقاەۆقا ۇجىمدىق حات جازدى. وقيعا تۋرالى تولىمدى اقپارات تاراتقان ازاتتىق راديوسىنىڭ حابارلاۋىنشا, اكىمدىك جاۋابىنا كوڭىلى تولماعان ولار اقورداعا قايرىلۋعا ءماجبۇر بولعان.

سەيسەنبى كۇندىز جۇزدەن ارتىق تاربيەشى جانە سول قاتارلى قىزمەتكەر تۇركىستان قالاسىنداعى اكىمشىلىك ىسكەرلىك ورتالىعىنا بارعان. نارازىلار تۇركىستان وبلىسىنىڭ بارلىق اۋدان قالالارىنان جينالدى. ولار قولدارىنا «تاربيەشىلەردىڭ ايلىق جالاقىسى كوتەرىلسىن!»، «ءبىزدىڭ دە ەڭبەگىمىز باسقا وبلىستار سياقتى باعالانسىن!» دەگەن جازۋى بار بىرنەشە پلاكات ۇستاپ شىققان.

اقپارات قۇرالىنا پىكىر بىلدىرگەن نارازىلاردىڭ ءبىرى ديلبار حابيبوۆا رەسپۋبليكا بويىنشا بيۋدجەت ەسەبىنەن ورتاشا ەسەپپەن «جەكەمەنشىك بالاباقشالاردا بالا باسىنا 40 مىڭ تەڭگەدەن تولەنىپ جاتىر. تۇركىستان وبلىسىندا ءۇش جىلدان بەرى 25 مىڭ تەڭگە تولەنەدى».

«جىل باسىنان بەرى تاربيەشىلەردىڭ ايلىق جالاقىسى 25 پايىزدان ەكى رەت كوتەرىلدى. ءبىز بالا باسىنا بەرىلەتىن اقشانى كوتەرمەي جاتقان سوڭ جالاقىنى وسىرە الماي وتىرمىز. تاربيەشىلەر «نەگە پەداگوگ تۋرالى زاڭ ورىندالماي جاتىر؟» دەپ كوتەرىلىپ جاتىر. سول ءۇشىن قۇرىلتايشىلار اكىمدىك الدىنا كەلدى»، – دەيدى حابيبوۆا.

نارازىلاردىڭ پىكىرىنشە، بالا باسىنا بەرىلەتىن قاراجاتتى وسىرمەي، كاسىپكەرلەردىڭ، تاربيەشىلەر مەن بالانىڭ تاپتالىپ كەلگەن قۇقىعى قالپىنا كەلمەيدى. مىسالى، جەكەمەنشىك بالاباقشالاردا جۇمىس ىستەيتىن قىزمەتكەرلەردىڭ جالاقىسى از. كىشى قىزمەتكەرلەردىڭ جالاقىسى – 40 مىڭ تەڭگە، تاربيەشىلەردىڭ جالاقىسى 50-70 مىڭ تەڭگە اراسىندا.

نارازى توپتى وبلىس اكىمىنىڭ ورىنباسارلارى كونگرەسس حولل عيماراتىنا كىرگىزىپ، سويلەسكەن. بىراق اكىمدىكتىڭ جاۋابىنا كوڭىلى تولماعان نارازىلار پەتيتسيا جازىپ، پرەزيدەنت قاسىم-جومارت توقاەۆقا جولدادى.

وبلىستىق ادامي الەۋەتتى دامىتۋ باسقارماسى باسشىسىنىڭ ورىنباسارى امانتاي وسەرباەۆ نارازى توپتىڭ شارتىمەن كەلىسەتىنىن ايتادى. ونىڭ سوزىنشە، بالاباقشاداعى بالا باسىنا قارجىلاندىرۋ 41 مىڭ تەڭگە بولعانىمەن 25 800 تەڭگە تولەنىپ جاتىر. كاسىپكەرلەردىڭ تالابىن ورىنداۋ ءۇشىن قارجى مينيسترلىگىنە حات جازىلعان.

وبلىس اكىمدىگىنىڭ مالىمەتىنشە، ايماقتا 1424 بالاباقشا بولسا، ونىڭ 1024-ءى – جەكەمەنشىك. جەكەمەنشىك بالاباقشاداعى بالا سانى ءجۇز مىڭنان اسادى. كەيىنگى جىلدارى قازاقستاندا پەداگوگتەردىڭ جالاقىسى بىلىكتىلىك ساناتىنا قاراي ايتارلىقتاي ۇلعايعانىمەن، بالاباقشا-بوبەكجاي قىزمەتكەرلەرىنىڭ ەڭبەكاقىسى پسيحولوگيالىق-ەموتسيونالدى قاجۋ مەن كۇندەلىكتى بازالىق شىعىندارمەن سالىستىرعاندا وتە ماردىمسىز.

The Qazaq Times