ترامپتىڭ شابۋىل جاساۋعا بۇيرىق بەرۋىنەن الاڭداعان گەنەرال قىتايعا حابار بەرگەن

بۇرىنعى پرەزيدەنت دونالد ترامپتىڭ قىزىمەتىنەن كەتەر الدىندا قىتايعا شابۋىل جاساۋعا بۇيرىق بەرۋىنەن الاڭداعان اقش-تىڭ جوعارى اسكەري گەنەرالى قىتايعا ەكى رەت حابارلاما جولداعان. وندا اقش-تىڭ قىتايعا شابۋىل جاسامايتىنىن، شابۋىل بولعان كۇندە دە الدىن الا ەسكەرتىلەتىنىن جەتكىزۋگە تىرىسقان.

قۇراما شتاتتاردىڭ جوعارى اسكەري گەنەرالى جانە شتاب باسقارماسىنىڭ بىرىككەن توراعاسى مارك ءميلليدىڭ بۇل ارەكەتى قوس پارتياداعى كونگرەسمەندەر اراسىندا ءتۇرلى پىكىر تۋعىزدى. ءتىپتى اراسىندا سەناتور رۋبيو سەيسەنبىدە پرەزيدەنت بايدەنگە حات جىبەرىپ، ءميلليدى قىزمەتىنەن الىپ تاستاۋدى سۇرادى.

بۇنداي مالىمەتتى Washington Post باسىلىمى ءبىرىنشى بولىپ جاريالادى. سەبەبى، باسىلىمنىڭ اعا اۆتورلارى بوب ۆۋدۆورد پەن روبەرت كوستانىڭ بىرىگىپ قۇراستىرعان «پەريل» اتتى جاڭا كىتابىندا ەگجەي-تەگجەيلى باياندالعان. كىتاپ كەلەسى اپتادا وقىرماندارعا تارالماق.

اتالعان رەپورتەرلەردىڭ جيناعان مالىمەتىنە قاراعاندا، گەنەرال ميللي 2020 جىلى پرەزيدەنت سايلاۋىنا ءتورت كۇن قالعاندا، ياعني 30 قازانىندا ءبىر رەت،  جانە ترامپ جاقتاستارى كاپيتوليگە باسىپ كىرگەن وقيعاسىنان ەكى كۇن وتكەننەن كەيىن ەكىنشى رەت قىتايلىق ارىپتەستەرىنە قوڭىراۋ سوعىپ، قۇراما شتاتتىڭ تۇراقتى كۇيدە ەكەنىن، قكپ-ىنا باعىتتالعان شابۋىل تۋرالى شەشىم جوق ەكەنىن ەسكەرتكەن.

اتالعان ەكى اۆتور دا قۇراما شتات بيلىگىنە قاتىستى توسىن دەرەكتەردى جيناۋمەن اتى شىققان تانىمال اۆتورلار. اسىرەسە بوب ۆۋدۆورد ترامپ اكىمشىلىگىنە قاتىستى كەزەكتى ەڭبەگىن قوسقاندا اق ءۇي مەن كاپيتولي، پەنتاگون اراسىنداعى ماسەلەلەردى تاقىرىپ ەتكەن 20 كىتاپ جازعان. 2014 جىلدان بەرى روبەرت كوستامەن بىرلەسىپ جۇمىس ىستەپ كەلەدى.

دونالد ترامپتىڭ ۇلى دونالد دجوردج ءوزىنىڭ «تۆيتتەر» پاراقشاسىنا گەنەرال ءميلليدىڭ ارەكەتىن ايىپتاعان جازبا جاريالادى. وندا ءميلليدىڭ ارەكەتى راستالاتىن بولسا، بۇل كاپيتوليگە شابۋىل جاساعانداردان دا اسىپ تۇسەتىن ساتقىندىق، وپاسىزدىق دەپ كورسەتكەن.

ال، گەنەرال مارك ميللي بولسا كونگرەسس الدىندا جاۋاپ بەرۋدەن باست تارتقان.

The Qazaq Times