ەلدى تاستاپ كەتكەن بۇرىنعى پرەزيدەنتى اۋعانستان حالقىنان كەشىرىم سۇرادى

ەلدەن قاشىپ كەتكەن اۋعانستانىڭ بۇرىنعى پرەزيدەنتى اشراف عاني سارسەنبى كۇنى (8 قىركۇيەك) «تۆيتتەر» ارقىلى مالىمدەمە جاساپ، «باسقاشا ىستەي الماعانى ءۇشىن» كەشىرىم سۇرادى.

15 تامىز تالىپتەر كابۋلعا باسىپ كىرگەن كەزدە سول كەزدەگى پرەزيدەنت اشراف عانيدىڭ ەلدەن قاشىپ كەتكەنى تۋرالى مالىمەت تاراعان، رەسەي ەلشىلىگىنەن تارتىپ ونىڭ كولىك تولى اقشا (شامامەن 169 ملن اقش دوللارى دەلىنگەن)  الىپ كەتكەنى دە ايتىلعان. بىرەر كۇنگە دەيىن اشراف عانيدى وزبەكستان نەمەسە تاجىكستانعا باس ساۋعالاپ كەتتى دەگەن دە اقپاراتتار شىققان. كەيىن ول بىرىككەن اراب امىرلىگىنەن ۆيدەو مالىمدەمە جاساپ، قان توگىستى بولدىرماۋ ءۇشىن ەلدەن كەتۋگە ءماجبۇر بولعانى ايتقان ەدى، ءارى وزىمەن بىرگە قىرۋار اقشا الىپ قاشقانى تۋرالى ايتىلعانداردى تەرىستەگەن.

«كابۋلدان كەتىپ قالۋىم ومىرىمدەگى ەڭ اۋىر شەشىمدەردىڭ ءبىرى بولدى، – دەدى اشراف عاني كەشەگى مالىمدەمەسىندە، – مەن پرەزيدەنت سارايى قىزمەتكەرلەرىنىڭ قاۋىپسىزدىك تالابى بويىنشا شىعىپ كەتتىم. ولار ماعان كابۋلدا قالاتىن بولسام 1990 جىلداعىداي قالاداعى قاقتىعىس ازاماتتىق سوعىسقا ۇلاسىپ كەتەتىنىن ايتتى»، – دەي كەلىپ، كابۋل مەن ونىڭ 6 ملن حالقىن قورعاۋ ءۇشىن وسىنداي شەشىمگە كەلگەنىن جازادى.

تۇراقسىزدىق جاعدايدا ەلدى تاستاپ كەتكەن اشراف عانيدىڭ ارەكەتى اۋعانستانداعى ساياساتكەرلەر جاعىنان قاتتى سىنعا قالعان بولاتىن. ءومىرىنىڭ 20 جىلىن اۋعانستاننىڭ تاۋەلسىز ەل رەتىندە دەموكراتيالىق دامۋىنا ارناعانىن ايتقان اۋعاننىڭ بۇرىنعى پرەزيدەنتى ءوز بيلىگىنىڭ «بۇرىنعى پرەزيدەنتتەردىكى سەكىلدى اياقتاعانىنا قاتتى وكىنگەن». "باسقاشا ارەكەت ەتە الماعانى ءۇشىن" اۋعانستاندىقتاردان كەشىرىم سۇراعان. سونىمەن بىرگە، ءوزىنىڭ ەلدەن كەتۋىنە سەبەپ بولعان ءتۇرلى مالىمەتتەردى الداعى ۋاقىتتا بولىسەتىنىن ەسكەرتكەن.

The Qazaq Times