كەشە، 23 تامىز كۇنى شىمكەنتتەگى ەڭبەكشى اۋداندىق پوليتسيا باسقارماسى ورىنباەۆ اتىنداعى گيپەرباريالىق وكسيگەناتسيا ورتالىعىندا قايتىس بولارانىڭ الدىندا "وتتەگى جەتپەي جاتقانىن" جازىپ كەتكەن ەر ادامنىڭ حاتىنا بايلانىستى قىلمىستىق ءىس قوزعادى. بۇل تۋرالى قالالىق پوليتسيا دەپارتامەنتىنىڭ مالىمەتىنە سۇيەنگەن ازاتتىق راديوسى حابارلادى. 

22 تامىز كەشكە Instagram جەلىسىندە ورتالىقتا كوروناۆيرۋستان قايتىس بولعان باق ەسىمدى ادامنىڭ حاتىن جاريالانعان. حاتتا ول وزىنە وتتەگى جەتپەي جاتقانىن، وتتەگىنى ءجيى وشىرەتىنىن جانە ءولىپ قالۋى مۇمكىن ەكەنىن جازىپ، باسقا جەرگە الماستىرۋدى سۇرايدى.

ازاتتىق مالىمەتىنشە، مارقۇمنىڭ حاتىن جاريالاعان پاراقشا جۇرگىزۋشىسى  حاتتى اتى-ءجونىن جاريالاۋدى قالامايتىن ورتالىق قىزمەتكەرى جىبەرگەنىن ايتقان. حات مارقۇمنىڭ تۋىسقاندارىنا جەتپەگەن.

بەيرەسمي مالىمەتتەرگە قاراعاندا، ورتالىقتا حاتتىڭ يەسى بولۋى مۇمكىن دەگەن ادام قايتىس بولعان. ونىڭ وتباسىندا ءۇش ادام كوروناۆيرۋس جۇقتىرىپ، ورتالىققا تۇسكەن. تۋىستارى مارقۇمنىڭ جەرلەنگەنىن ايتقان.

شىمكەنت قالالىق دەنساۋلىق ساقتاۋ باسقارماسى بۇل حاتتىڭ ورتالىقتان شاققانىن راستاي دا المايدى، جوققا دا شىعارمايدى. ورتالىقتىڭ باس دارىگەرى مادينا ەرماحانبەتوۆا وتتەگى تولىق جەتەتىنىن، وتتەگى جەتىسپەۋشىلىگىنەن قايتىس بولعان ادام جوق ەكەنىن ايتادى.

دەسە دە پوليتسيا الەۋمەتتىك جەلىدە تاراپ كەتكەن حاتقا بايلانىستى قىلمىستىق كودەكستىڭ "مەديتسينا نەمەسە فارماتسەۆتيكا جۇمىسكەرىنىڭ كاسىپتىك مىندەتتەرىن تيىسىنشە ورىنداماۋى" (317-باپ) بابىمەن قىلمىستىق ءىس قوزعالعانىن، تەرگەۋ امالدارى باستالعانىن حابارلادى.

The Qazaq Times