كەشە، 22 تامىزدا الماتى اۋەجايىنا  بىرىككەن ۇلتتار ۇيىمىنىڭ اۋعانستانداعى ءبىر توپ قىزمەتكەرى مىنگەن ۇشاق قوندى. ولار اۋعانستانداعى جاعداي تۇراقتاعانشا، قازاقستاندا بولماق.

«كەشە بۇۇ قىزمەتكەرلەرى مىنگەن ەكىنشى رەيس كەلدى. بورتتا 108 ادام بار. بارلىق ورنالاستىرۋ مالىمەتى بۇعان دەيىن ءباسپاسوز بريفينگىندە ايتىلعان اقپاراتپەن بىردەي. ولاردىڭ قازاقستانعا كەلۋىنە كەتكەن بارلىق شىعىن بۇۇ ەسەبىنەن تولەنەدى» دەدى بۇۇ ءباسپاسوز قىزمەتى.

قازاقستانداعى رەسمي باق-تاردىڭ مالىمەتىنشە، قازىر بارلىق جولاۋشى كارانتيندە، ولار پتر تەست تاپسىردى.

الماتىعا بۇعان دەيىن دە اۋعاستاندا جۇمىس ىستەيتىن بۇۇ قىزمەتكەرلەرى كەلىپ ورنالاسقان. قازاقستان سىرتقى ىستەر مينيسترلىگىنىڭ مالىمەتىنشە، بۇۇ قىزمەتكەرلەرى ەلدە اۋعانستانداعى جاعداي تۇراقتاعانشا، شامامەن التى اي بولادى دەپ كەلىسىلگەن.  قىزمەتكەرلەردىڭ قازاقستاندا تۇرۋ شىعىنىن بۇۇ-نىڭ ءوزى كوتەرەدى.

The Qazaq Times