اۋعانستاننان امەريكالىقتار مەن وداقتاس ەلدەر ازاماتتارىن ەۆاكۋاتسيالاۋ 31 تامىزعا دەيىن اياقتالۋى مۇمكىن. بۇل تۋرالى اقش پرەزيدەنتى جو بايدەن ايتتى. 

جەكسەنبىدە اق ۇيدە سويلەگەن بايدەن "تاليبان" قوزعالىسى بيلىكتى العان تامىزدىڭ ورتاسىنان باستاپ اقش اۋعانستان استاناسى كابۋلدان 28 مىڭ ادامدى الىپ كەتكەنىن مالىمدەدى. ونىڭ ىشىندە امەريكانىڭ دا، اقش وداقتاستارىنىڭ ازاماتتارى دا، تالىپتەر قۋعىنىنان قاۋىپتەنەتىن اۋعاندار دا بار.

بايدەن اقش اسكەرىنە تالىپتەر شابۋىل جاساماعانىن، ەۆاكۋاتسياعا اسا كەدەرگى كەلتىرە قويماعانىن اتاپ ءوتتى. دەگەنمەن 31 تامىزعا دەيىن اياقتالۋعا ءتيىس ەۆاكۋاتسيا وداقتاس ەلدەر وتىنەتىن بولسا، ءارى قاراي ۇزاۋى دا مۇمكىن ەكەنىن جوققا شىعارمادى. بۇل ماسەلە 24 تامىزدا "جەتىلىك توبىنىڭ" ونلاين-سامميتىندە تالقىلانۋى مۇمكىن.

ەۆاكۋاتسيالانۋعا مىندەتتى ادامداردىڭ ناقتى سانى بەلگىسىز. اۋعانستاننان كەتكىسى كەلەتىن مىڭداعان ادام كابۋل اۋەجايى توڭىرەگىندە جاتىر. بىراق ولاردىڭ ءبارى بىردەي ەۆاكۋاتسيا تالاپتارىنا ساي كەلە بەرمەيدى. اۋەجاي اۋماعىنا كىرەمىن دەپ كەيىنگى اپتا ىشىندە 20-عا جۋىق اۋعان ازاماتى ولگەن.

The Qazaq Times