تاليباننىڭ تاريحي جيىنى. فوتو: BBC

كەشە، «تاليبان» ۇيىمى ءوزىنىڭ العاشقى ءباسپاسوز جيىنىن وتكەردى. جيىندا نەگىزىنەن ۇيىم اتىنان زابيحۋللا مۋجاحيد سويلەدى. ول جۋرناليستەر سۇراقتارىنا جاۋاپ بەرىپ، ايەل قۇقىعىنا قۇرمەتپەن قارايتىندارىن جەتكىزگەن.

شىن مانىسىندە سەيسەنبى كۇنى وتكەن ءباسپاسوز جينالىسى تاريحي وقيعا دەپ اتاۋعا بولادى. سەبەبى، «تاليبان» ۇيىمىنىڭ رەسمي وكىلدەرى العاش رەت جۇزدەرىن اشىققا شىعارىپ، جۋرناليستەرمەن بەتپە-بەت وتىرىپ جاۋاپ بەردى. بۇعان دەيىن اقپارات قۇرالدارى ولاردان تەك تەلەفون ارقىلى عانا جاۋاپ الىپ كەلگەن. ال، رەسمي مالىمدەمەلەر تەك جازباشا تۇردە جانە الەۋمەتتىك جەلىلەردى، وزدەرىنىڭ اقپارات ارنالارىن پايدالانا وتىرىپ جاسالاتىن.

«ءبىز ەشقانداي ىشكى جانە سىرتقى دۇشپاندىقتى قالامايمىز»، – دەدى ءتالىپ وكىلدەرى جۋرناليستەر سۇراعىنا جاۋاپ بەرگەندە. ولار ءباسپاسوز جينالىسىنا ايەل جۋرناليستەردى دە قاتىستىرعان. باق وكىلدەرىنە ارنالعان جيىندا اۋعانستانداعى كەيبىر جۋرناليستەر 10 جىل بويى تەلەفون ارقىلى جاۋاپ الىپ كەلگەن «تاليبان» وكىلىن العاش رەت ءوز كوزىمەن كوردى. ايتالىق، BBC-ءدىڭ سول ەلدەگى ءجۋرناليسى يالدا حاكيم ءوزىنىڭ تاڭدانىسىن اشىق جازىپتى.

ءباسپاسوز جينىندا بەلگىلى بولعانداي تالىپتەر «اۋقىمدى جاڭا ۇكىمەت قۇرۋ» دايىندىعىندا. ايەلدەر قۇقىعى «يسلام قايدالارى شەڭبەرىندە قۇرمەتتەلەدى» دەگەن ەكۇشتى سوزدەرى دە بار. سونداي-اق، بارلىق ەلدەرمەن تەك ىنتىماقتاستىق، دوستىق قاتىناستا بولاتىنىن جەتكىزگەن. ايتا كەتەيىك، تالىپتەر وسىعان دەيىن جاسىرىپ كەلگەن ليدەرلەرىن دە الەمگە اشىق كورسەتىپ، «كورىمدىك الاتىنىن دا ايتقان».

The Qazaq Times