اۋعانستان پرەزيدەنتى: «تاليباندى» نە كەلىسسوزگە كەلەدى، نە سوعىسىپ جەڭەمىز

اۋعانستان پرەزيدەنتى اشراف عاني ۇلتتىق ماجىلىستە مالىمدەمە جاساپ، «تاليباندى» تاڭداۋ جاساۋعا شاقىردى. ول سوزىندە اۋعانستان ۇكىمەتىنىڭ بەيبىتشىلىك ءۇشىن كوپ بوداۋ بەرىپ كەلگەنىن، ەندىگى تاڭداۋى «نە تالىپتەرمەن كەلىسسوزگە وتىرۋ، نە سوعىسىپ جەڭۋ» ەكەنىن ايتقان.

ءسوزىن ەلدى بىرلىككە شاقىرۋمەن باستاعان پرەزيدەنت عاني، ەلدى قالپىنا كەلتىرىپ، تەرروريزمگە قارسى كۇرەسۋ ءۇشىن بۇرىنعىدان دا بەكەم بىرلىك كەرەك ەكەنىن باسا اتاپ كورسەتكەن. سونداي-اق، ۇكىمەتتىڭ باستى ۇستانىمى بەيبىتشىلىكتى قالپىنا كەلتىرۋ، تۇراقتىلىققا جەتۋ ەكەنىن تاعى ءبىر رەت ايتىپ وتكەن.

اۋعانستان پرەزيدەنتى بۇعان دەيىن كابۋل بيلىگى بەيبىتشىلىك پەن تۇراقتىلىقتى ساقتاۋ ءۇشىن كوپ بوداۋ بەرگەنىن ايتقان. «تاليبان نە كەلىسسوز ۇستەلىنە وتىرادى، نە سوعىستا جەڭەمىز. بۇل ءبىزدىڭ تاڭداۋىمىز. ەندى «تاليبان» تاڭداۋ جاساسىن»، – دەگەن سوزىندە اشراف عاني.

قازىر دە، اۋعان جەرىندە ۇكىمەت كۇشتەرى مەن تالىپتەر اراسىندا قاقتىعىس سۇراپىل ءجۇرىپ جاتىر. مالىمەتتەرگە قاراعاندا، ۇكىمەت تارابى 34 پروۆينتسيانى تولىقتاي باقىلاۋىندا ۇستاپ تۇر. ال، ەلدەگى 407 اۋداننىڭ 150-دەن استامىن تالىپتەر وزىنە قاراتقان.

“The Qazaq Times”