وزبەكستاندا كوروناۆيرۋسقا قارسى ارنايى رەسپۋبليكالىق كوميسسيا بىرقاتار ساناتتاعى ازاماتتارعا ۆاكتسينا الۋدى مىندەتتەۋ جونىندە شەشىم شىعاردى.

28 ماۋسىمدا وزبەكستاندا كارانتين شارالارى كۇشەيتىلگەن بولاتىن.«دەلتا» شتامىن جۇقتىرعاندار سانىنىڭ ارتۋىنا بايلانىستى ەلدە جالپىحالىقتىق ۆاكتسيناتسيا قارقىندى جۇرگىزىلىپ جاتىر. دەنساۋلىق ساقتاۋ مينيسترلىگىنىڭ مالىمەتىنشە، «حالىقتىڭ سانيتارلىق-ەپيدەميولوگيالىق ساۋلىعى» تۋرالى زاڭعا سايكەس، وزبەكستاننىڭ باس مەملەكەتتىك سانيتار دارىگەرى قوعام ءۇشىن قاۋىپتى ينفەكتسيالىق جانپە پارازيتارلىق اۋرۋلار پايدا بولىپ، ەلدە تاراعان جاعدايدا سانيتارلىق جانە ەپيدەمياعا قارسى ءتيىستى شارالاردى جۇرگىزۋ جونىندە شەشىم قابىلداۋعا قۇقىلى.

حابارلامادا: «اتالعان زاڭنىڭ 30-بابىندا ەپيدەمياعا قارسى سانيتارلىق-گيگيەنالىق شارالار وتكىزۋ جانە اۋرۋدىڭ الدىن الاتىن ەكپە سالۋ سەكىلدى ءىس-قيمىل كەشەنى قاراستىرىلعان. وسىنى ەسكەرە كەلە وزبەكستاننىڭ باس سانيتار دارىگەرى، سانيتارلىق-ەپيدەميولوگيالىق يگىلىك جانە قوعام دەنساۋلىعى قىزمەتىنىڭ باستىعى باحودير يۋسۋپاليەۆ كوروناۆيرۋسقا قارسى ۆاكتسينا سالدىرۋدى مىندەتتەۋ جونىندە شەشىم قابىلدادى» – دەلىنگەن.

قابىلدانعان شەشىمگە سايكەس، 18 جاستان اسقان بەلگىلى ءبىر ساناتقا جاتاتىن ازاماتتار ءۇش دوزالى ەكپەنى سالدىرۋعا مىندەتتى. ياعني ازاماتتار 1 قىركۇيەككە دەيىن – ۆاكتسينانىڭ ءبىرىنشى كومپونەنتىن، 1 قازانعا دەيىن – ەكىنشى، ال 1 قاراشاعا دەيىن – ءۇشىنشى كومپونەنتىن ەكتىرۋگە ءتيىس.

ەكپە سالدىرۋعا مىندەتتى ازاماتتار ءتىزىمى:

– حالىقپەن تىكەلەي قويان-قولتىق جۇمىس ىستەيتىن قىزمەت كورسەتۋشى مەكەمە قىزمەتكەرلەرى (پوشتا، بانك، ليزينگ كومپانيالارى، نوتاريۋس، ساقتاندىرۋ كومپانيالارى، سۇلۋلىق سالوندارى، شاشتاراز جانە باسقالار);

– ساۋدا نىساندارىنىڭ جۇمىسشىلارى (ازىق-تۇلىك، تۇرمىستىق تاۋارلار، كيىم دۇكەندەرى، ءدارىحانا جانە باسقا);

– سپورت مەكتەپتەرى مەن سپورت قۇرىلىمدارىنىڭ قىزمەتكەرلەرى - مادەني ويىن-ساۋىق مەكەمەلەرى مەن دەمالىس بازاسىنىڭ جۇمىسشىلارى;

– قوناق ءۇي، حوستەل، جاتاقحانا جانە كەمپينگ قىزمەتكەرلەرى;

– جولاۋشى تاسىمالىمەن اينالىساتىن مەملەكەتتىك جانە مەملەكەتتىك ەمەس مەكەمە قىزمەتكەرلەرى;

– ءبىلىم بەرەتىن مەملەكەتتىك جانە مەملەكەتتىك ەمەس مەكەمە قىزمەتكەرلەرى;

– اسكەري قىزمەتكەرلەر - كافە، مەيرامحانا، شايحانا، تويحانا سەكىلدى قوعامدىق تاماقتانۋ وبەكتىلەرىنىڭ جۇمىسشىلارى;

– تۇرعىن ءۇي-كوممۋنالدىق شارۋاشىلىق سالاسىنىڭ قىزمەتكەرلەرى;

– بايلانىس جانە تەلەكوممۋنيكاتسيا سالاسىنىڭ قىزمەتكەرلەرى;

– مەملەكەتتىك بيلىك جانە باسقارۋ ورگاندارى قىزمەتكەرلەرى;

– قۇقىق قورعاۋ ورگاندارىنىڭ قىزمەتكەرلەرى.

"The Qazaq Times"