گەرمانيادا ەلدىڭ باتىسىنداعى سۋ تاسقىنىنا بايلانىستى اسكەري اپات رەجيمى ەنگىزىلدى. اپتا باسىندا ايماقتا ەكى ايلىق جاۋىننىڭ مولشەرى جاۋىپ، رەيننىڭ ەكى سالاسى – ار جانە موزەل جانە بىرنەشە كىشى وزەن ارناسىنان اسقان.

سۋ تاسقىنى سالدارىنان جۇزدەن استام ادامنىڭ ءولىمى راستالدى. تاعى مىڭعا جۋىعى حابار- وشارسىز كەتكەن. اپاتتان سولتۇستىك رەين-ۆەستفاليا جانە رەينلاند-پفالتس جەرلەرى زارداپ شەكتى. وڭىردە قۇتقارۋشىلار مەن 900-گە جۋىق اسكەري قىزمەتكەر جۇمىلدىرىلدى.

ارۆايلەر ايماعىندا توتەنشە جاعداي ەنگىزىلگەن. بيلىك 1300 ادامنىڭ ۇشتى-كۇيلى جوعالىپ كەتكەنىن، 60 ادامنىڭ قازا تاپقانىن حابارلادى. سونداي-اق وڭىردە 165 مىڭ تۇرعىن جارىقسىز قالعان. رەين وزەنى مەن ونىڭ تارماقتارىنىڭ بويىندا ورنالاسقان كوپتەگەن قالادا سۋ تاسىپ جاتىر. تاسقىن سۋدىڭ قۇرساۋىندا قالعان حالىق قۇتقارۋشىلاردى ۇيلەردىڭ شاتىرىندا كۇتۋگە ءماجبۇر.

بۇل ۋاقىتتا اقش-قا رەسمي ىسساپارمەن كەتكەن كانتسلەر انگەلا مەركەل حالىققا ۆيدەوۇندەۋىندە: «قازىر ۆاشينگتوندا جۇرسەم دە بۇكىل ويىم وتانىمداعى حالقىممەن بىرگە. قايعى جامىلعان بارلىق ادامعا كوڭىل ايتامىن. بەيبىت كەزدە ۇلكەن قاسىرەتكە تاپ بولدىق»، – دەدى.

گەرمانيادان بولەك، نيدەرلاند، بەلگيا، شۆەيتساريانىڭ قالالارىن دا سۋ باستى. قازىر تۇرعىندار ەۆاكۋاتسيالانىپ جاتىر. سينوپتيكتەر جاۋىن-شاشىن اپتا سوڭىنا دەيىن جالعاساتىنىن ەسكەرتتى.

"The Qazaq Times"