قىرعىزستان اۋعانستاننان كەلەتىن قاۋىپكە قارسى دايىندالۋدا

قىرعىزستان ۇكىمەتى اۋعانستاننان كەلەتىن قاۋىپتەن الاڭداپ وتىر. قىرعىزستاننىڭ ۇلتتىق قاۋىپسىزدىك جونىندەگى مەملەكەتتىك كوميتەت جەتەكشىسى قامشىبەك تاشيەۆ كەشە ارنايى مالىمدەمە بارىسىندا اۋعانستاننان كەلەتىن بوسقىندار مەن ءتۇرلى ەكسترەميستىك توپتاردىڭ سىن-قاتەرى ارتىپ كەلە جاتقانىن اتاپ ءوتتى.

ك.تاشيەۆ سوزىندە اۋعانستاننان كواليتسيا كۇشتەرىنىڭ شەگىنىپ كەتۋى «يسلام مەملەكەت»، «جاماعات تاۋحيد ءۋال-جيھادي»، «تۇركىستان يسلام قوزعالىسى» سەكىلدى حالىقارالىق تەررورلىق توپتاردىڭ ەلدەگى بەلسەندىلىگىن ارتتىرىپ، ورتا ازياعا ونىڭ ىشىندە قىرعىزستانعا باعىتتالعان ءىس-قيمىلدارى اكتيۆتى دەڭگەيگە كوتەرىلگەنىن اتاپ وتكەن.

قازىر وزبەكستان مەن تاجىكستاننىڭ اۋعانستانمەن شەكاراسىندا قاۋىپتىڭ اشىققا شىققانىنا توقتالعان تاشيەۆ: «مۇنداي قاۋىپ ءبىزدىڭ ەلدە دە بولماي قويمايدى. سوندىقتان، ءبىز دە ورتا ازياداعى وزگە ەلدەر سەكىلدى اۋعانستاننان كەلەتىن قاۋىپكە دايىندالۋدامىز»، – دەگەن.

قىرعىزستان مەن تاجىكستان ورتاسىنداعى شەكارا جانجالى جانە ونىڭ قاقتىعىسقا ۇلاسىپ كەتۋى اۋعانستاندا بەلسەندىلىگىن ارتتىرىپ جاتقان تەررورلىق توپتاردىڭ نازارىن وزىنە اۋداردى. بۇل قىرعىز-تاجىك قانا ەمەس، تۇتاس ورتا ازيا وڭىرلىك قاۋىپسىزدىگى ءۇشىن دە اسا ءبىر ءمان بەرۋگە ءتيىستى ماسەلەگە اينالعان.

“The Qazaq Times”