تاجىك شەكاراسىنا قاشىپ كىرگەن اۋعان اسكەرلەرىنىڭ سانى مىڭنان استى

«تاليباننان» باس ساۋعالاىپ تاجىكستان شەكاراسىنا كىرىپ كەتكەن اۋعان ساربازدارىنىڭ سانى مىڭنان استى. بۇنداي مالىمەتتى تاجىك شەكاراشىلارى دا، كابۋل رەسميلەرى دە راستادى. تاجىكستان ۇقشۇ-دان كومەك سۇرادى جانە رەزەرۆتەگى 20 مىڭ جاساقتى موبليزاتسيالادى. 

سوڭعى كەزدەرى «تاليبان» ۇيىمى اقش پەن ناتو كۇشتەرىنىڭ ەلدەن شەگىنىپ جاتقانىنان پايدالانىپ ەلدەگى باقىلاۋ ايماقتارىن كەڭەيتىپ جاتىر. اسىرەسە ەلدىڭ وزبەكستان جانە تاجىكستانمەن شەكارالاس سولتۇستىك ايماقتارىنداعى بەلسەندىلىگى ارتا ءتۇستى.

كەيبىر سىرت ەلدەردىڭ ارا اعايىندىعىمەن ءوتىپ جاتقان كەلىسسوزدەرگە قاراماستان «تاليبان» ۇيىمى ۇكىمەت كۇشتەرىمەن سوعىستى توقتاتۋدان باس تارىتپ كەلەدى. قازىر ەلدىڭ ۇشتەن ءبىر بولىگىن باقىلاۋىنا العان تالىپتەر كابۋلدى باسىپ الىپ، ەلدى تۇتاستاي باقىلاۋدا ۇستاۋدى كوزدەيدى.

ەكى اپتا ىشىندە اۋعان تارابىنان تاجىكستان شەكاراسى 5 رەت بۇزىلدى. ولار نەگىزىنەن تالىپتەردەن ىعىسىپ تاجىكستانعا كىرۋگە ءماجبۇر بولعان اۋعان قاۋىپسىزدىك كۇشتەرى. قازىرگە دەيىن 1600-دەن استام اۋعانستاندىق جاۋىنگەر شەكارادان وتكەن.

تاجىكستان مەن اۋعانستان اراسىنداعى ەكى شەكارا بەكەتىن «تاليبان» ۇيىمىنىڭ باقىلاۋعا الۋى تاجىكستاندى ەكونوميكالىق قىسىمعا ۇشىراتتى. بۇل جولدار تاجىكستاننىڭ اۋعانستان ارقىلى پاكىستان، ءۇندىستان جانە يرانعا تاۋار تاسىمالدارىن بۋىپ تاستاعان.

“The Qazaq Times”