"تاليبان" كۇشتەرى. فوتو: گازەتا.رۋ.

اۋعانستاندا ۇكىمەت پەن «تاليبان» اراسىندا تەرريتورياعا تالاس سوعىستارى كۇشەيدى. تالىپتەردىڭ بىرنەشە شەكارا بەكەتتەرىن باسىپ الۋى تاجىكستاندى ەكونوميكالىق قيىنشىلىققا ۇشىراتۋدا.

قىرعىزستانمەن شەكارالىق جانجالدان كەيىن ەكى ەل شەكاراسى جابىلىپ، بۇل بەلگىلى دەڭگەيدە قىرعىز جانە تاجىك ەكونوميكاسىنا اسەر ەتكەن ەدى. ەندى تالىپتەردىڭ شەكارا بەكەتتەرىن باسىپ الۋى تاجىكستاننىڭ اۋعانستان ارقىلى پاكىستان، يرانعا جانە ۇندىستانعا تاۋار تاسىمالىن توقتاتىپ قويدى.

قىرعىزستاندىق ساياساتتانۋشى ءارى كونفليكتولوگ ازامات تەمىرقۇلوۆ BBC-ءدىڭ قىرعىز قىزمەتىنە بەرگەن جاۋابىندا تاجىكستاندا ەكونوميكالىق جاعداي ناشارلاي تۇسسە، بۇل ەل ىشىندەگى قايشىلىقتى كۇشەيتىپ، ناتيجەسىندە تۇراقسىزدىق ورناۋى مۇمكىن ەكەنىن ايتقان.

تاجىكستاننىڭ تۇراقتىلىعىنا ورتالىق ازيا ەلدەرىنە قوسا رەسەي دە مۇددەلى. ەگەر تالىپتەردىڭ اسەرىنەن تاجىكستاندا تۇراقسىزدىق ورناسا بۇل رەسەيگە اسا ماڭىزدى ستراتەگيالىق ايماق سانالاتىن ورتالىق ازياعا دا ءوز ىقپالىن جاساماق. سوندىقتان دا قازىر ماسكەۋ قىرعىز-تاجىك اراسىنداعى مامىلەنىڭ تەزىرەك قالپىنا كەلۋىنە مۇددەلى بولىپ وتىر.

“The Qazaq Times ”