"Талибан" күштері. Фото: Газета.ру.

Ауғанстанда үкімет пен «Талибан» арасында территорияға талас соғыстары күшейді. Тәліптердің бірнеше шекара бекеттерін басып алуы Тәжікстанды экономикалық қиыншылыққа ұшыратуда.

Қырғызстанмен шекаралық жанжалдан кейін екі ел шекарасы жабылып, бұл белгілі деңгейде қырғыз және тәжік экономикасына әсер еткен еді. Енді тәліптердің шекара бекеттерін басып алуы Тәжікстанның Ауғанстан арқылы Пәкістан, Иранға және Үндістанға тауар тасымалын тоқтатып қойды.

Қырғызстандық саясаттанушы әрі конфликтолог Азамат Темірқұлов BBC-дің қырғыз қызметіне берген жауабында Тәжікстанда экономикалық жағдай нашарлай түссе, бұл ел ішіндегі қайшылықты күшейтіп, нәтижесінде тұрақсыздық орнауы мүмкін екенін айтқан.

Тәжікстанның тұрақтылығына Орталық Азия елдеріне қоса Ресей де мүдделі. Егер тәліптердің әсерінен Тәжікстанда тұрақсыздық орнаса бұл Ресейге аса маңызды стратегиялық аймақ саналатын Орталық Азияға да өз ықпалын жасамақ. Сондықтан да қазір Мәскеу қырғыз-тәжік арасындағы мәміленің тезірек қалпына келуіне мүдделі болып отыр.

“The Qazaq Times ”