جاڭا قوزعالىستىڭ قۇرىلاتىندىعى جايلى مالىمدەمە جاساپ جاتقان بەلسەندىلەر. الماتى، 23 ماۋسىم 2021. فوتو: Azattyq.org

بۇگىن، 23 ماۋسىمدا الماتىدا ءبىر توپ قوعام بەلسەندىسى ءباسپاسوز ءماسليحاتىن وتكىزىپ، "حالىق سەنىمى" ("نارودنوە دوۆەريە") ازاماتتىق قوزعالىسىن قۇراتىنىن مالىمدەدى. بۇل اقپاراتتى ازاتتىق راديوسى حابارلادى.

ازاتتىقتىڭ جازۋىنشا، قوزعالىس مۇشەلەرى اراسىندا بۇرىنعى ديپلومات قازبەك بەيسەباەۆ، جالپىۇلتتىق-سوتسيال دەموكراتيالىق پارتياسىنىڭ مۇشەسى، ەكونوميست ايدار الىباەۆ، قوعام بەلسەندىلەرى عابيدەن جاكەي، مارات ۋاتحان، جەلتوقسانشى، جازۋشى تالعات ايتبايۇلى، اۋعان سوعىسى ارداگەرلەرىنىڭ باسشىسى بايداۋلەت داركەمباي، اقىن بولات شاراحىمباي بار. قازبەك بەيسەباەۆ پەن عابيدەن جاكەي قوزعالىستىڭ تەڭ توراعاسى رەتىندە تانىستىرىلعان.

باستاماشىلار "قازاقستاندا بيلىكتىڭ حالىققا ەسەپ بەرمەيتىن قۇيتىرقى جۇيەسى قالىپتاستى. مەملەكەت حالىق ۇنىنە قۇلاق اسپايدى. رەفورمالار قاعاز جۇزىندە عانا. ءارتۇرلى كۇماندى باعدارلامالار مەن جوبالارعا بيۋدجەتتەن مول قاراجات ءبولىپ جاتىر. بيلىك "دەموكراتيا جولىمەن جۇيەلى دامىپ كەلە جاتىر" دەپ الدارقاتىپ وتىر" دەپ سانايدى.

قوزعالىس باعدارلاماسىن وقىعان قازبەك بەيسەباەۆ "حالىق سەنىمى" قوزعالىسىنىڭ قازاقستاندا تىيىم سالىنعان ساياسي ەكسترەميستىك ۇيىمدارمەن جانە قانداي دا ءبىر وپپوزيتسيالىق ۇيىمدارمەن بايلانىسى جوقتىعىن مالىمدەدى.

- سىرتتان بىرەۋ كەلىپ، ەلىمىزدىڭ جاعدايىن جاساپ بەرەدى دەپ ۇمىتتەنۋگە، قول قۋسىرىپ وتىرۋعا بولمايدى. حالىقتان شىققان شىنايى ساياسي ۇيىم بولسا قولدار ەدىك دەگەندى الەۋمەتتىك جەلىدەن ءجيى كورەمىز. ءبىزدىڭ قوزعالىس ناعىز حالىقتىق قوزعالىس بولادى،- دەدى قازبەك بەيسەباەۆ.

عابيدەن جاكەيدىڭ سوزىنشە، قوزعالىسقا كىرەمىن دەۋشىلەرگە شەكتەۋ جوق.

ولاردىڭ سوزىنشە، "حالىق سەنىمى" قوزعالىسى ساياساتقا بەلسەندى ارالاسىپ، بولاشاقتا پارتياعا اينالاتىن بولادى.

باستاماشىلار قوزعالىس "كراۋدفاندينگ" ادىسىمەن حالىقتان، جەكە بيزنەستەن جينالعان قارجىمەن جۇمىس ىستەيتىنىن ايتقان.

"The Qazaq Times"