جاپاروۆ انكارادا. فوتو: BBC قىرعىز قىزمەتى.

تۇركياعا رەسمي ساپارمەن بارعان قىرعىزستان پرەزيدەنتى سادىر جاپاروۆ تۇركيا پرەزيدەنتى رەجەپ تايىپ ەردوعانمەن كەزدەسۋدە فەتحۋللاح گۇلەن جانە ونىڭ جاقتاستارىنا قارسى كۇرەسۋ تۋرالى كەلىسىمگە كەلدى. 

سوڭعى بىرەراپتادا قىرعىزستاندىق باق انكارا بيلىگى جاعىنان ەكسترەميست رەتىندە اتالعان، امەريكا قۇراما شتاتتارىندا تۇراتىن فەتحۋللاح گۇلەن تۋرالى ايىپتاۋ سيپاتىنداعى اقپاراتتار كوبىرەك تاراتىلدى. بۇنىڭ سەبەبى قىرعىزستان مەن تۇركيا باسشىلارىنىڭ كەزدەسۋىنەن كەيىن بەلگىلى بولدى. ەكى ەل باسشىسى تەررورلىق ۇيىمدارعا، ونىڭ ىشىندە فەتو-عا قارسى كۇرەسۋدە ىنتىماقتاستىق ورناتقانىن مالىمدەدى.

جاپلى سادىر جاپاروۆتى تۇركيا جىلى قارسى الدى. بىرلەسكەن ءباسپاسوز جيىنىندا ەردوعان: "تۇركيا قىرعىز ەلى مەن ۇكىمەتىن قولدايتىنىن قۇرمەتتى پرەزيدەنتكە دە تاعى ءبىر مارتە جەتكىزدىم. ساياسي تۇراقتىلىق باعىتىندا قىرعىزستانمەن ءاربىر قادامىمىز بىرگە بولادى", – دەدى. بۇعان قوسا تاراپتار كەلىسكەندەگىدەي فەتو ەكسترەميستىك توبىنا قارسى ورتاق كۇرەستە جەڭىسكە جەتەتىندەرىنە سەنىم ءبىلدىردى.

ەردوعان جەتەكشىلىك ەتكەن قازىرگى تۇرىك بيلىگى 2016 جىلى جۇزەگە اسپاي قالعان اسكەري توڭكەرىسكە تۇرىك ءدىني عۇلاماسى فەتحۋللاح گۇلەندى جانە ونىڭ جاقتاستارىن ايىپتايدى. انكارا گۇلەن مەن ونىڭ جاقتاستارىن فەتو دەپ اتاپ، ەل ىشىندە تىيىم سالعان تەررورلىق ۇيىم قاتارىنا كىرگىزگەن.

ال، ۇزاق جىلداردان بەرى اقش-تا تۇراتىن گۇلەن بولسا ءوز مالىمدەمەلەرىندە بۇل توڭكەرىسكە ەش قاتىسىنىڭ جوق ەكەنىن ايتىپ كەلەدى.

بۇعان دەيىن تۇركيا قىرعىزستان ۇكىمەتىنەن فەتو-عا قاتىسى بار دەپ تاۋىپ، ەلدەگى "سەبات" ليتسەيلەرىن جابۋدى تالاپ قىلىپ كەلگەن، دەگەنمەن، قىرعىز بيلىگى بۇل ليتسەيلەردى ەشقانداي قاۋىپتى ەمەس دەپ تانىپ، قىرعىزستاننىڭ ءبىلىم بەرۋ مينيسترلىگىنىڭ باقىلاۋىنا بەرگەن.

جاپاروۆتىڭ كەزەكتى ساپارىندا انكارا تارابىنان بۇنداي تالاپ قايتالانعانى تۋرالى رەسمي مالىمەت جوق. جاقىندا قىرعىزستانداعى "سەبات" ليتسەيلەرىنىڭ پرەزيدەنتى ورحان يناندى ءىز-تۇسسىز جوعالىپ كەتكەن. بۇل قىرعىزستاندا ۇلكەن اقپاراتتىق اڭىس تۋدىرعان وقيعالاردىڭ ءبىرى بولدى. اتالعان ليتسەي وقىتۋشىلارى مەن وقۋشىلارى، عىلىمي قىزمەتكەرلەرى نارازىلىق اكتسيالارىن قازىرگە دەيىن جالعاستىرىپ كەلەدى. ولاردىڭ اراسىندا  ۇكىمەتتى ورحان يناندى تۋرالى مالىمەتتى جاسىرىپ وتىر دەپ ايىپتاعاندارى دا بولدى.

“The Qazaq Times”