نۇرجان التاەۆ ءوزى جەتەكشىلىك ەتەتىن «ەل تىرەگى» پارتياسىن تىركەتۋ ماقساتىندا ادىلەت مينيسترلىگىنە جەتىنشى مارتە ءوتىنىش بەرىپ، تالپىنىپ جاتقانى جونىندە مالىمدەدى. ول بيلىك «بۇل جولى دا كونستيتۋتسيانى بۇزىپ، تىركەۋدەن باس تارتقان جاعدايدا» جاقتاستارىن الاڭعا شاقىرماق.

 «ەگەر ۇكىمەت... ءبىز ۇسىنعان مالىمەتتەردى بۇرمالاپ، تىزىمدە قايتىس بولعاندار بار نەمەسە جسن سايكەس كەلمەيدى دەگەن جالالى جەلەۋمەن جارامسىزعا شىعارسا، وندا قاتارى از ەمەس جاقتاستارىمىزدى الاڭعا شىعىپ، قاتاڭ تالاپ بىلدىرەتىن بولامىز. ميتينگكە رۇقسات ەتىلسە دە، ەتىلمەسە دە، تالاپ الاڭدا ايتىلادى»، – دەدى پارتيانىڭ ۇلتتىق مۇددەنى قورعاۋعا ارنالعان ءتورتىنشى كەڭەس وتىرىسىندا.

ونىڭ ايتۋىنشا، پارتيا باستاماشىل توبى بىلتىرعى 26 قاراشادان بەرى ادىلەت مينيسترلىگىنە تىركەۋگە باس-اياعى جەتى رەت ءوتىنىش بەرگەن. التاۋىنان باس تارتقان ۆەدومستۆو بىرەر كۇن بۇرىن تابىستالعان وتىنىمگە ءالى جاۋاپ بەرە قويعان جوق.

«مەنىڭ بيلىككە ايتار باستى ەسكەرتۋىم – نە قازىر كونستيتۋتسيا نەگىزىندە ارەكەت ەتىپ تىركەسىن، نە سالدارى ۋشىعاتىن بولادى. ەرتەڭ ەشكىم مۇنىڭ قالاي دەمەسىن. ءبىز ارەكەتتەنگەندە توسىننان بولدى دەپ رەنجىمەسىن»، – دەدى ول.

التاەۆ ۇلتتىق مۇددەنى قورعاۋ كەڭەس مۇشەلەرىن، سونداي-اق قوعام قايراتكەرى بولاتبەك ءبىلالوۆ، جسدپ توراعاسى اسحات راحىمجانوۆ، تىركەلمەگەن دەمپارتيا كوشباسشىسى جانبولات ماماي مەن «الاش» پارتيالارىنىڭ جەتەكشىلىگىن وسى باستاماعا قوسىلۋعا شاقىردى.

"The Qazaq Times"