Amazon كومپانياسىنىڭ نەگىزىن قالاۋشى دجەفف بەزوس 20 شىلدەدە ءوزىنىڭ باۋىرىمەن بىرگە عارىشقا ساپار شەگەدى. ولار عارىشقا وزدەرىنە تيەسىلى Blue Origin كومپانياسىنىڭ New Shepard كەمەسىمەن اتتانباق.

ساپارعا ارنايى ۇيىمداستىرىلعان ونلاين-اۋكتسيوننىڭ جەڭىمپازى دا بارادى. جولاۋشىلارعا ارنالعان جالعىز جولدامانىڭ تاعدىرى 12 ماۋسىمدا ونلاين ساۋدا-ساتتىق كەزىندە انىقتالادى.

دجەفف بەزوستىڭ Blue Origin اەروعارىش كومپانياسى New Shepard كەمەسىنىڭ ەكيپاجبەن العاشقى سۋبوربيتالىق ۇشۋىنا ورىن الۋعا وتىنىمدەردى 2020 جىلدىڭ 20 شىلدەسىنەن باستاپ ۇسىنعان. باستاپقىدا كومپانيا جوسپارى بويىنشا ءباسساۋدا جابىق رەجيمدە وتكەن. وعان 136 ەلدەن 5200 ۇمىتكەر قاتىستى.

جوسپار بويىنشا، عارىش تۋريستەرى جەردەن 100 شاقىرىم بيىكتىككە كوتەرىلىپ، سۋبوربيتالىق كەڭىستىككە ەنەدى. سودان كەيىن ولار عارىشتا قالىقتاپ ءجۇرىپ، سالماقسىزدىق جاعدايىندا پلانەتانى ۇستىنەن بىرنەشە مينۋت تاماشالاپ، جەرگە ءۇش پاراشيۋتكە بايلانعان ارنايى كاپسۋلامەن ورالادى. كاپسۋلانىڭ التى تەرەزەسى «بوينگ-747» ۇشاعىنىڭ اينەكتەرىنەن الدەقايدا ۇلكەن.

استرونومداردىڭ ايتۋىنشا، بۇل قاشىقتىقتا اسپان قارا، ال جەردىڭ دوڭەس بەتى وتە انىق كورىنەدى. دەگەنمەن تۋريستەر 400 شاقىرىم بيىكتىكتە ورنالاسقان حالىقارالىق عارىش ستانتسياسىنا جەتە المايدى. وتكەن ونجىلدىقتا بۇل ستانتسياعا بارىپ-قايتۋ ءۇشىن تۋريستەر ونداعان ملن دوللار تولەگەن بولاتىن.

"The Qazaq Times"