ش.مۇقان مەن س.مايعازيەۆ

مەملەكەتتىك ساتىپ الۋ پورتالىنداعى دەرەكتەردى نەگىزگە العان جۋرناليستەر مەن بەلسەندى ازاماتتار 2 اي بۇرىن ءانشى ساكەن مايعازيەۆ باسقاراتىن شىمكەنت قالالىق مادەنيەت ءۇيىنىڭ ناۋرىز مەرەكەسىنە ارنالعان ءىس-شارالارعا 595 ملن تەڭگە بولگەنىن انىقتاعان. بۇل وقيعا قوعامدا شۋ تۋعىزىپ، بەلسەندى ازاماتتار اكىمدىكتەن ناۋرىزعا جۇمسالعان قارجىنىڭ ەسەبىن سۇراعاندا، قالا اكىمىنىڭ ءبىرىنشى ورىنباسارى شىڭعىس مۇقان جۋرناليستەر كەلتىرگەن رەسمي دەرەكتى جوققا شىعارعان ەدى.

ول سول كەزدە جارتى ملرد تەڭگەدەن استام قاراجات "تەك ناۋرىز مەرەكەسىنە عانا ەمەس، جىل بويى وتەتىن ءىس-شارالار ءۇشىن قاراستىرىلدى" دەپ مالىمدەگەن. الايدا Qazaqtimes ءتىلشىسى شىمكەنت قالالىق مادەنيەت ءۇيى مامىرداعى مەرەكەلەرگە وراي دا مەملەكەتتىك ساتىپ الۋ پورتالىندا ءۇش كەلىسىمشارت جاساسقانىن انىقتادى. بۇل – مۇقاننىڭ "ناۋرىزعا 213 ملن تەڭگە ءبولىندى، 572 ملن تەڭگە جىل بويى وتەتىن ءىس-شارالار ءۇشىن قاراستىرىلعان" دەگەنىن جوققا شىعاراتىن بىردەن-ءبىر فاكت. ويتكەنى شىمكەنت قالالىق مادەنيەت ءۇيىنىڭ جىل باستالعالى مەرەكەلىك ءىس-شارالار ءۇشىن جاساسقان كەلىسىمشارتتارىنىڭ جالپى قۇنى قازىردىڭ وزىندە 610 ملن تەڭگەدەن اسىپ كەتتى.

مايعازيەۆ باسقاراتىن مەكەمەنىڭ مامىرداعى تەندەرلەرى

شىمكەنت قالالىق مادەنيەت ءۇيى 19 مامىردا "قازاقستان حالقىنىڭ بىرلىگى مەرەكەسىنە جانە "ShymQala" ەتنو اۋىلىنىڭ اشىلۋىنا ارنالعان ءىس-شارا" ءۇشىن "يپ توحتاحۋنوۆ" دەگەن كومپانيامەن كەلىسىمشارت جاساسقان. قۇنى 8 548 500 تەڭگە. اتالعان كومپانيا بيىلعى اقپاندا عانا تىركەلگەن. اشىق دەرەككوزدەردە كومپانيانىڭ مەكەنجايى رەتىندە الماتى قالاسى كورسەتىلىپ تۇر. بۇعان دەيىن ەشقانداي تەندەرگە قاتىسپاعان. مەملەكەتتىك ساتىپ الۋ پورتالىنا مايعازيەۆ باسقاراتىن مەكەمەدەن تەندەر الاردان 13 كۇن بۇرىن، ياعني 6 مامىردا عانا تىركەلگەن.

"يپ توحتاحۋنوۆ" كومپانياسىمەن جاسالعان كەلىسىمشارتتىڭ سكرينشوتى.

ءبىر ايتا كەتەتىن جايت – جوعارىداعى ساتىپ الۋ بويىنشا كەلىسىمشارتقا 19 مامىردا قول قويىلىپ، 21 مامىردا "يپ توحتاحۋنوۆ" كومپانياسىنا ءتيىستى قارجى (8 548 500 تەڭگە) تولەنگەن. ال شىمكەنت مادەنيەت باسقارماسىنا تيەسىلى الەۋمەتتىك جەلى پاراقشالارىندا "ShymQala" ەتنو اۋىلىنىڭ اشىلۋىنا ارنالعان ءىس-شارانىڭ 4 مامىردا وتكەنىن بايقاۋعا بولادى. بۇل دەرەكتەر كەلىسىمشارتقا ءىس-شارا ءوتىپ قويعان سوڭ قول قويىلعانىن اڭعارتىپ تۇر.

شىمكەنت قالالىق مادەنيەت ءۇيى "7 مامىر وتان قورعاۋشىلار كۇنىن" دە ۇمىت قالدىرعان جوق. مەكەمە بۇل مەرەكەگە وراي "يپ "ەسەنوۆ ت.ا." دەگەن كومپانيامەن 5 450 000 تەڭگەگە كەلىسىمشارت جاساسقان. بۇل ساتىپ الۋ بويىنشا دا كەلىسىمشارتقا مەرەكە ءوتىپ كەتكەن سوڭ، ياعني 19 مامىردا قول قويىلعان.

مەكەمەنىڭ مامىردا جاساسقان ءۇشىنشى كەلىسىمشارتى "ەل ەسىمى - ەل ەسىندە" جەڭىستىڭ 76 جىلدىعىنا ارنالعان مەرەكەلىك ءىس-شارا" دەپ اتالادى. كەلىسىمشارتقا جەڭىس كۇنىنە ارنالعان ءىس-شارالار ءوتىپ كەتكەن سوڭ، ياعني، 21 مامىردا قول قويلىعان. تاپسىرىستى ورىنداۋشى – استانادا تىركەلگەن OYOU كومپانياسى. مەملەكەتتىك ساتىپ الۋ پورتالىنداعى اقپاراتقا قاراعاندا، اتالعان كومپانيا بۇعان دەيىن 10 رەت تەندەر قتقان. ونىڭ بارلىعىندا تاپسىرىس بەرۋشى مەكەمە – مادەنيەت جانە سپورت مينيسترلىگىنىڭ «استانا قالاسىنداعى قازاقستان رەسپۋبليكاسىنىڭ ۇلتتىق اكادەميالىق كىتاپحاناسى» رمم".

جاۋاپتان جالتارعان شىڭعىس مۇقان 

QazaqTimes شىمكەنت قالالىق مادەنيەت ءۇيى مامىرداعى مەرەكەلەرگە وراي دا بىرنەشە ءىس-شارا ۇيىمداستىرعانىنا كوز جەتكىزگەننەن كەيىن قالا اكىمىنىڭ ورىنباسارى شىڭعىس مۇقانعا حابارلاستى. بىراق ونىڭ وزىمەن سويلەسۋ مۇمكىن بولعان جوق. ءتىلشىنىڭ قوڭىراۋىنا جاۋاپ بەرگەن اكىم ورىنباسارىنىڭ حاتشىسى ءبىر كۇن بويى ءتۇرلى سىلتاۋ ايتتى. كەيىن ءتىپتى تەلەفوندى كوتەرمەي قويدى.

ش.مۇقان فوتو: Nur.kz

QazaqTimes شىڭعىس مۇقاننان "ساۋىردە ءبارىنىڭ ەسەبىن بەرەمىز" دەگەن "ۋادەسى" نەگە ورىندالماعانىن، "572 ملن تەڭگە جىل بويى وتەتىن ءىس-شارالارعا قاراستىرىلدى" دەگەن مالىمەتى نە سەبەپتى مەملەكەتتىك ساتىپ الۋ پورتالىنداعى رەسمي دەرەككە قايشى ەكەنىن سۇراماق بولعان.

"The Qazaq Times"