فوتو: sk-pharmacy.kz

قازاقستاندا "ۆاكتسينادان كەيىن قايتىس بولدى" دەلىنگەن ءتورت ادامنىڭ ەكەۋىنىڭ ولىمىنە ۆاكتسينا سەبەپ بولعانى دالەلدەنبەگەن. قالعان ەكەۋىنە قاتىستى كوميسسيا جۇمىسى جالعاسىپ جاتىر. بۇل تۋرالى 19 مامىردا وتكەن بريفينگتە دەنساۋلىق ساقتاۋ ۆيتسە-ءمينيسترى اجار عينايات مالىمدەدى.

ونىڭ ايتۋىنشا، الماتى وبلىسىندا پەرزەنتحانادا جۇمىس ىستەگەن مەديتسينا قىزمەتكەرىنىڭ ولىمىنە قاتىستى كوميسسيا جۇمىسىن اياقتاعان. مارقۇم دارىگەردىڭ بۇرىننان جۇرەگى اۋىرعان، ديسپانسەرلىك تىركەۋدە تۇرعان، بىراق ءجيى قارالماعان. قاجەتتى ءدارى-دارمەك قابىلداماعان.

"سوت-مەديتسينالىق ساراپتاماسىنىڭ ناتيجەسى مەن كوميسسيانىڭ تۇپكىلىكتى قورىتىندىسىنا سايكەس، پاتسيەنتتىڭ ءمايىتىن تەكسەرۋ كەزىندە ۆيرۋسوميا بەلگىلەرى نەمەسە كوروناۆيرۋستىڭ ورگاندارعا اسەرى انىقتالمادى. سوزىلمالى جۇرەك پاتولوگياسى بولعان، قايتىس بولۋىنا سول سەبەپ بولدى، وسىعان وراي ادام ءولىمىنىڭ ۆاتسيناعا قاتىسى دالەلدەنبەدى" دەدى اجار عينايات .

ونىڭ سوزىنە قاراعاندا، الماتى قالاسى تۇرعىنىنىڭ ولىمىنە قاتىستى سوت-مەديتسينالىق ساراپتاما ناتيجەسى ازىرگە دايىن بولماعان. مينيسترلىك وكىلى مارقۇمنىڭ ديسپانسەرلىك ەسەپتە تۇرماعانىن، دارىگەرلەرگە تۇراقتى تۇردە قارالماعانىن ايتتى. بىراق ونىڭ "قان قىسىمى جوعارى بولعان، جۇرەگى اۋىرعان".

ۆيتسە-ءمينيستردىڭ ايتۋىنشا، كوميسسيا اقتوبە وبلىسىندا قايتىس بولعان تۇرعىننىڭ جۇرەك سوعىسىنىڭ بۇزىلعانىن (اريتميا) انىقتاعان، بۇل كوپ جاعدايدا جۇرەك يشەمياسىنا اپارادى، سول سەبەپتى ادام ءولىمىنىڭ ۆاكتسيناعا قاتىسى جوق دەگەن قورىتىندى جاسالعان.

ال ءتورتىنشى ازامات ۆاكتسينانىڭ ەكىنشى كومپونەنتى سالىنعاننان كەيىن 12 كۇن وتكەن سوڭ قايتىس بولعان. ونىڭ ءولىمىن كوميسسيا ءالى زەرتتەپ جاتىر.

قازاقستاندا كوروناۆيرۋسقا قارسى جاپپاي ۆاكتسيناتسيالاۋ 1 اقپاندا باستالعان.

"The Qazaq Times"