يزرايل-پالەستينا قاقتىعىسىنان قازا تاپقاندار سانى ارتتى

يزرايل مەن پالەستينا قاقتىعىسىنان قاز تاپقاندار سانى ارتتى. سوڭعى مالىمەتتەر بويىنشا، گازا سەكتورىندا 67 ادام، ال يزرايلدە 7 ادام اجال قۇشقان.

سونداي-اق ەۆرەي ەلىنىڭ پرەمەر-ءمينيسترى بينيامين نەتانياحۋ اۋە شابۋىلى كەزىندە «حاماس» ۇيىمىنىڭ قولباسشىسى مەن 15 مۇشەسى ولتىرىلگەنىن مالىمدەدى. بۇل اقپاراتتى وسى ۇيىمنىڭ باسشىسى دا راستادى. بينيامين نەتانياحۋ: «سوڭعى كۇندەرى ءبىزدىڭ قالالاردا بولىپ جاتقان وقيعالار ادام توزگىسىز. اراب بۇلىكشىلەرىنىڭ سيناگوگالاردى، كولىكتەردى تالقانداپ، پوليتسەيلەر مەن بەيبىت جانە جازىقسىز ازاماتتارعا شابۋىل جاساپ جاتقانىن كورىپ وتىرمىز. بۇل – انارحيا. سونداي-اق ەۆرەيلەردىڭ ارابتاردى ۇرىپ-سوعىپ، ءوز بەتىمەن جازالاپ جاتقانىن دا قاتاڭ ايىپتايمىز. زورلىق-زومبىلىق ءبىزدىڭ جولىمىز ەمەس. ءيزرايلدىڭ بارلىق قالالارىنداعى جاعدايدى باقىلاۋعا الامىز»، – دەيدى.

ال پالەستينا پرەزيدەنتى ماحمۇد ابباس مالىمدەمەسىندە: «قۇددىس پالەستينانىڭ جانى مەن جۇرەگى. ونى تولىق ازات ەتپەي، ەشقانداي دا بەيبىتشىلىك، قاۋىپسىزدىك بولمايدى. قۇددىس – پالەستينانىڭ، ماڭگىلىك مەملەكەتتىڭ استاناسى. مەن اقش پەن يزرايلگە «جەتەدى ەندى، ەلىمىزدەن كەتىڭدەر» دەپ، شەگەلەپ تۇرىپ ايتقىم كەلەدى. جەرىمىزدەگى باسىپ الۋ ساياساتىن ەرتەڭ ەمەس، بۇگىن توقتاتىڭدار»،– دەدى.

كەشە «حاماس» تەل-اۆيۆ اۋماعى مەن اشدود، اشكەلون جانە سدەروت قالالارىن زىمىرانمەن اتقىلادى. ازىرگە، بۇۇ مەن ەگيپەت، كاتار سياقتى ەلدەردىڭ اتىستى توقتاتۋعا قاتىستى ءىس-ارەكەتتەرى ناتيجە بەرگەن جوق. سوندىقتان دا اقش يزرايلدىكتەر مەن پالەستينالىقتاردى تاتۋلاستىرۋ ءۇشىن ارنايى وكىل جىبەرمەك،

10 مامىر تۇندە يزرايل اسكەريلەرى گازا سەكتورىنا اۋەدەن 130 سوققى جاساعانىن، اۋە سوققىسى كەزىندە قارۋلى ادامداردان بولەك قارۋ-جاراق ساقتاۋ ورىندارى، قويمالار، تۋننەلدەر نىساناعا الىنعانىن مالىمدەدى.

يزرايل گازانى باسقارىپ وتىرعان حاماس (بۇل قوزعالىستى يزرايل، اقش، ەو جانە باسقا دا ەلدەر تەرروريستىك ۇيىم دەپ تانىعان، رەسەي تەرروريستىك ۇيىم دەپ سانامايدى) پەن باسقا دا قارۋلى توپتار 200 راكەتا اتتى دەيدى.

تاياۋ شىعىستاعى شيەلەنىس وتكەن ايدا ۋشىعا باستاعان. وعان يزرايل سوتىنىڭ يەرۋساليمدەگى شەيح-دجاراح اۋدانىنان پالەستينالىقتاردى كوشىرۋ تۋرالى شەشىمى سەبەپ بولدى. يزرايل 1967 جىلى تاياۋ شىعىستاعى سوعىستان سوڭ شىعىس يەرۋساليمدى باسىپ الىپ، استانامىز دەپ جاريالاعان. بىراق حالىقارالىق قاۋىمداستىق يەرۋساليمدى يزرايل استاناسى دەپ مويىندامادى. پالەستينالىقتار شىعىس يەرۋساليمدى ءوز جەرىمىز ءارى بولاشاقتا قۇرىلاتىن تاۋەلسىز ەلىمىزدىڭ استاناسى بولادى دەپ سانايدى.

"The Qazaq Times"