قىتايدىڭ NetEase ويىن-ساۋىق پورتالىنىڭ 15 ساۋىردەگى حابارىندا، وسى ەلدىڭ "حۋنان" تەلەارناسىندا تاراتىلىپ جاتقان «ءانشىمىن» (i am a singer 2017) اتتى جاڭا مۋزىكالىق جوبانىڭ فينالدىق باسەكەسى كەشە كەشتە اقىرلاسقان. قورىتىندى باسەكەنىڭ ەرەكشەلىگى فينالعا قاتىسقان انشىلەر وزىنە جۇپ رەتىندە ءبىر-ءبىر تانىمال ءانشىنى شاقىرىپ، بىرلىكتە ونەر كورسەتتى. ديماش بۇل جولى وزىمەن بىرگە ونەر كورسەتۋگە قىتايلىق ايگىلى انشى شاڭ ۆىنجيەنى (Shang Wenjie/ 尚雯婕) تالداعان.  

شاڭ ۆىنجيە بولسا 2006 جىلعى اتالعان تەلەارنانىڭ «Super girls» بايقاۋىنىڭ جەڭىمپازى. قازىر قىتاي انشىلەر اراسىندا جۇلىزى جانىپ تۇرعان انشىلەردىڭ قاتارىندا. فينالدىق باسەكەدە ونەر كورسەتكەن جۇبتار اراسىندا دا ديماش پەن شاڭ ۆىنجيەنى ناعىز جوعارى ۇيلەسىمدىلىك دەپ تانىلدى. جوبا ساراپشىلارى ولاردىڭ كورسەتكەن ونەرىن جوعارى باعالاعان.

ديماش پەن ونىڭ ساحناداعى جۇبىنىڭ ميكروبلوكتاعى دوستىق قارىم-قاتىناسى دا ولاردىڭ جانكۇيەرلەرىن قاتتى قىزىقتىرىپتى. بۇل رەتكى بىرلەسە ونەر كورسەتۋى ەكى ءانشىنىڭ جانكۇيەرلەرىنىڭ تالابىنان شىعۋمەن قاتار، ەكەۋىندەگى شىعارماشىلىق تاجىريبە الماسۋدى تەرەڭدەتىپتى. بۇنى ساحناعا شىعاردان بۇرىنعى قوس ونەر جۇلدىزىنىڭ تەلەاناعا بەرگەن سۇحباتتارىندا مويىنداپ وتىر. شاڭ ۆىنجيە بولسا ديماشتى «مۋزىكا سالاسىندا توڭكەرىس اكەلگەن تالانتتى ءانشى» دەپ مويىنداپتى.

قىتايداعى اقپارات قۇرالدارى مەن الەۋمەتتىك جەلىلەردە فينالدىق باسەكەنىڭ تاراتىلۋىنان بۇرىن ءار ءتۇرلى بولجامدار ايتىلىپ ۇلگەرگەن. ونىڭ اراسىندا بىرەۋلەر ديماشتى بۇل جوباداعى «سۋپەر ءانشى»، «singer 2017» تەلەجوباسىنىڭ برەندى دەگەن باعالار دا كەزدەسەدى. ميلليونداعان پىكىرلەردىڭ ورتاق سيمۆولى رەتىندە قىتايداعى تانىمال «Netease» سايتىنىڭ پىكىرىن كەلتىرۋگە بولادى. وندا: «ديماش جوبادا جارقىراپ كوزگە ءتۇستى دە، كوكجيەكتى جارىپ شىققان قاناتتى تۇلپارداي الەم كەڭىستىگىنە سامعادى. ول جوبا بارىسىندا ميلليونداعان جانداردى وزىنە ءتانتى ەتىپ، اۋديتورياسىنا تەرەڭ ماحاببات دارىتتى. فينالدىڭ ناتيجەسى قالاي بولسا دا، ديماش بۇل جوبانىڭ جەڭىمپازى»، – دەپ جازىلعان.

ايتا كەتەيىك، بايقاۋ فينالى سۇراپىل تارتىسقا تولى بولدى. ديماشتى قولداۋعا قازاقستاننان ونىڭ اتا-اناسى باستاعان ءبىراز ادامدار باردى. سونىمەن قاتار، قازاقستان رەسپۋبليكاسىنىڭ قىتاي حالىق رەسپۋبليكاسىنداعى توتەنشە جانە وكىلەتتى ەلشىسى شاحرات نۇرىشەۆ، قازاقستاننىڭ حالىق ءارتىسى ايمان مۇساحودجاەۆا باستاعان قۇرمەتتى قوناقتار دا بار.

  “The Qazaq Times”