مايعازيەۆ باسقاراتىن مادەنيەت ءۇيىنىڭ ناۋرىزداعى ساتىپ الۋلارىنا تالداۋ جۇرگىزىلىپ جاتىر

سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتى شىمكەنت قالالىق مادەنيەت ءۇيىنىڭ قىزمەتىندەگى سىبايلاس جەمقورلىق تاۋەكەلدەرىنە تالداۋ جۇرگىزىپ جاتىر. بۇل جايلى دەپارتامەنتتىڭ رەداكتسيامىزعا جولداعان رەسمي جاۋابىندا ايتىلعان.

«دەپارتامەنت باستاماسىمەن قالالىق مادەنيەت، تىلدەردى دامىتۋ جانە مۇراعاتتار باسقارماسى جانە وعان باعىنىستى «شىمكەنت قالالىق مادەنيەت ءۇيى» كونتسەرتتىك ۇيىمىنىڭ قىزمەتىندە اۋديتورلار مەن قوعام مۇشەلەرىن تارتا وتىرىپ، سىبايلاس جەمقورلىق تاۋەكەلدەرىنە سىرتقى تالداۋ جۇرگىزىلىپ جاتىر. سىرتقى تالداۋ شەڭبەرىندە ناۋرىز مەيرامى مەرەكەلىك ءىس-شارالارىن وتكىزۋگە ارنالعان مەملەكەتتىك ساتىپ الۋ راسىمدەرى جان-جاقتى قارالاتىن بولادى» دەلىنگەن دەپارتامەنتتىڭ رەداكتسياعا جولداعان رەسمي جاۋاپ حاتىندا.

اتالعان حاتتا «جۇرگىزىلگەن  تالداۋدىڭ ناتيجەلەرى قوسىمشا حابارلاناتىنى» ايتىلعان. الايدا دەپارتامەنت ول اقپاراتتى ناقتى قاي ۋاقىتتا حابارلايتىنىن انىق جازباعان.

شىمكەنت قالالىق مادەنيەت ءۇيىنىڭ ناۋرىز مەرەكەسىنە 595 ملن تەڭگە جۇمساعانى قوعامدا شۋ تۋدىرعان. اتالعان ۇيىمنىڭ  ناۋرىعا وراي ءتۇرلى ءىس-شارالار وتكىزۋ ءۇشىن 7 كومپانيامەن كەلىسىمشارت جاساسقانىن جۋرناليستەر مەن مەملەكەتتىك ساتىپ الۋ سالاسىن زەرتتەۋشىلەر انىقتاعان. الايدا ۇيىم باسشىسى ساكەن مايعازيەۆ، شىمكەنت قالاسى اكىمنىڭ ءبىرىنشى ورىنباسارى شىڭعىس مۇقان قوعام شۋىنان كەيىن ءباسپاسوز جيىنىن وتكىزىپ، ناۋرىزعا 595 ملن تەڭگە جۇمسالماعانىن ايتتى، بىراق ونى دالەلدەپ بەرە المادى.

"The Qazaq Times"