قازاقستاننىڭ ەكى بوكسشىسى الەم چەمپيوناتىنىڭ التىنىن جەڭىپ الدى

پولشانىڭ كەلتسە قالاسىندا وتكەن بوكستان جاستار اراسىنداعى الەم چەمپيوناتىندا  قازاقستان قۇراماسى ەكى التىن، ءتورت كۇمىس، ءتورت قولا مەدال جەڭىپ الدى.

قازاقستاننىڭ قىزدار قۇراماسى 10 سالماقتىڭ بەسەۋىندە جۇلدەگە ىلىكتى، بىراق التىن مەدال العان جوق. اسەل ساعاتوۆا (81 كگ), ەلدانا ءتالىپ(+81 كگ) جانە جاسمين قيزاتوۆا(69 كگ) جارتىلاي فينالدا جەڭىلىپ، قولا جۇلدەگەر اتانسا، جۇلدىز شاياحمەتوۆا(60 كگ) مەن دانا ديداي(75 كگ) اقتىق سىندا ۇتىلىپ، كۇمىس جۇلدەنى مىسە تۇتتى.

قىزدار اراسىندا ءۇندىستاننىڭ جەتى بوكسشىسى چەمپيون اتاندى. قالعان ءۇش سالماقتىڭ التىنى رەسەي، وزبەكستان جانە تۇركيا قىزدارىنىڭ ەنشىسىندە.

قازاقستاننىڭ ەرلەر قۇراماسى دا 10 سالماقتا سىنعا ءتۇسىپ، بەسەۋىندە جۇلدە جەڭىپ الدى.

ەڭ جەڭىل سالماق - 49 كيلوگرامدا جۇدىرىقتاسقان سانجار تاشكەنباي جانە 64 كيلوگرامدا جۇدىرىقتاسقان سابىرجان اققالىقوۆ الەم چەمپيونى اتاندى. 56 كيلوگرامداعى ەربولات سابىر مەن 60 كيلوگرامداعى ەلنۇر ءسۇيىنباي كۇمىس جۇلدەگەر جەڭىپ السا، 75 كيلوگرامداعى دياس مولجىگىتوۆتىڭ ەنشىسىندە - قولا مەدال.

"The Qazaq Times"