رەسەيدە ناۆالنىيدىڭ جاقتاستارىن ۇستاپ اكەتىپ جاتىر

بۇگىن رەسەيدە الەكسەي ناۆالنىي جاقتاستارىنىڭ ميتينگى بەلگىلەنگەن. ميتينگ ەل پرەزيدەنتى ۆلاديمير ءپۋتيننىڭ حالىققا جولداۋىمەن قاتار كەلدى. بىراق پوليتسيا ءار قالاداعى شەرۋگە شىققان بەلسەندىلەر مەن جۋرناليستەردى ءسات سايىن ۇستاپ اكەتىپ جاتىر.

«نارازىلىق اپولوگياسى» سايتىنىڭ مالىمەتىنشە, ميتينگ بەلگىلەنگەن الاڭداردى پوليتسيا قورشاۋعا العان. ماسكەۋدە الەكسەي ناۆالنىيدىڭ ءباسپاسوز حاتشىسى كيرا يارمىش، وپپوزيتسيونەر ليۋبوۆ سوبول، ساياساتكەر ۆلاديمير رىجكوۆتى ۇستاپ اكەتكەن. ەكى بەلسەندى دە سوت قاڭتاردا وتكەن ناۆالنىيدى قولداۋ اكتسياسىندا «ەپيدەميولوگيادىق ەرەجەلەردى بۇزدى» دەپ ايىپتاعان. SOTA باسىلىمىنىڭ ءتىلشىسى سەرگەي كۋوكۋگە ميتينگىگە قاتىسپاۋ جايلى ەسكەرتۋ جاساعان.

كراسنوداردا سوت ناۆالنىي كومانداسىنىڭ بەلسەندىسى اليپات سۋلتانبەگوۆانى نارازىلىق اكتسياسى تۋرالى TikTok-تا جاريالانعان ۆيدەوسى ءۇشىن 10 كۇنگە قاماۋعا العان.  پوليتسيا حاتتاماسىندا «حالىقتى نارازىلىق اكتسياسىنا قاتىسۋعا شاقىرىپ، بەينەروليگىندە ميتينگ تۋرالى زاڭدى بۇزدى» دەلىنگەن.

ال ۆولگوگرادتىڭ ورتالىق سوتى ناۆالنىيدىڭ جەرگىلىكتى شتابىنىڭ ۇيلەستىرۋشىسى ەۆگەني كوچەگيندى 25 كۇنگە قاماۋعا العانى بەلگىلى بولدى. وعان دا «الەۋمەتتىك جەلىدە ميتينگكە ۇندەدى» دەگەن ايىپ تاعىلعان.

سانكت-پەتەربۋرگتە بىرنەشە بەلسەندىنىڭ ۇيىنە ءتىنتۋ جۇرگىزىلگەن. ولاردىڭ پروتسەسسۋالدىق ستاتۋسى ازىرگە بەلگىسىز.

كرەمل سىنشىسى الەكسەي ناۆالنىي 31 ناۋرىزدان بەرى اشتىق جاريالاپ، دەنساۋلىعى ناشارلاعان. وسى اپتادا پوكروۆاداعى تۇرمەدەن سوتتالعاندارعا ارنالعان وبلىستىق اۋرۋحاناعا اۋىستىرىلدى. بۇعان دەيىن ناۆالنىيدى ەمدەگەن دارىگەرلەر ونىڭ قان ءاناليزىنىڭ قورىتىندىسىن جاريالاپ، دارىگەر اناستاسيا ۆاسيلەۆا ناۋقاستىڭ جۇرەگى توقتاپ قالۋى مۇمكىن دەپ ەسكەرتكەن.

ناۋرىزدىڭ سوڭىندا مىڭنان استام دارىگەر بيلىككە اشىق حات جازىپ، ساياساتكەرگە تاۋەلسىز دارىگەردى كىرگىزۋگە شاقىرعان.  ال بۇگىن دارىگەرلەر ناۆالنىيدىڭ ءحالىن ءبىلۋ ءۇشىن ارنايى بارعان. بىراق تۇرمە اكىمشىلىگى ولاردىڭ كىرۋىنە رۇقسات ەتپەگەن. ماماندار وپپوزيتسيونەردىڭ جاعدايى اۋىر دەيدى. ەندى وسىعان بايلانىستى حالىقارالىق ورگان رەسەي ۇكىمەتىنە وپپوزيتسيونەردىڭ تۇرمەدە قۇقىقتارىنىڭ ساقتالۋى جانە وعان كورسەتىلىپ جاتقان مەديتسينالىق قىزمەتتىڭ ساپاسىنا قاتىستى سۇراقتار جولداعان. ەۋروپانىڭ ادام قۇقىقتارى جونىندەگى سوتى جولدانعان ساۋالعا رەسەي بيلىگى 12 شىلدەگە دەيىن جاۋاپ بەرۋى ءتيىس.

20 تامىز تومسك قالاسىنان ماسكەۋگە بەت العان وپپوزيتسيونەر ساياساتكەر الەكسەي ناۆالنىي بورتتا جاعدايى ناشارلاپ، ۇشاق دەرەۋ ومبى قالاسىنا قونۋعا تۋرا كەلگەن. كەيىن جەدەل جاردەممەن وپپوزيتسيونەردى ومبىداعى اۋرۋحاناعا جەتكىزگەن. كەيىن گەرمانيا ناۆالنىيدى بەرليندەگى اۋرۋحاناعا اكەتۋ ءۇشىن ارنايى ساناۆياتسيا جىبەرگەن. باسىندا ومبى دارىگەرلەرى ناۆالنىيدى ورنىنان قوزعاۋعا بولمايدى دەپ ونى گەرمانياعا جىبەرۋدەن باس تارتقان. كەيىن ومبىلىق دارىلەرلەر ناۆالنىيدى اۋرۋحانادان اكەتۋگە رۇقسات بەرىپ، ناۆالنىي 22 تامىزدا بەرلينگە جەتكىزىلگەن. وسى وقيعادان كەيىن كەشكىسىن ناۆالنىيدى قولداۋ ماقساتىندا ماسكەۋ، پەتەربۋرگ، نوۆوسيبيرسك، تومەنگى نوۆگورود قالالارىندا ونداعان ادام نارازىلىق وتكىزگەن. باق وكىلدەرى تاراتقان اقپارات بويىنشا، ولاردىڭ كوبىن پوليتسيا ۇستاپ اكەتكەن.

"The Qazaq Times"