ناۆالنىي ءىسىن ەۋروپالىق سوت قارايدى

كرەمل سىنشىسى الەكسەي ناۆالنىيدىڭ ءىسىن ەۋروپانىڭ ادام قۇقىقتارى جونىندەگى سوتى كەزەكتەن تىس قارايدى.

وسىعان بايلانىستى حالىقارالىق ورگان رەسەي ۇكىمەتىنە وپپوزيتسيونەردىڭ تۇرمەدە قۇقىقتارىنىڭ ساقتالۋى جانە وعان كورسەتىلىپ جاتقان مەديتسينالىق قىزمەتتىڭ ساپاسىنا قاتىستى سۇراقتار جولداعان. ەۋروپانىڭ ادام قۇقىقتارى جونىندەگى سوتى جولدانعان ساۋالعا رەسەي بيلىگى 12 شىلدەگە دەيىن جاۋاپ بەرۋى ءتيىس.

الەكسەي ناۆالنىي 31 ناۋرىزدان بەرى اشتىق جاريالاپ، دەنساۋلىعى ناشارلاعان. كەشە پوكروۆاداعى تۇرمەدەن سوتتالعاندارعا ارنالعان وبلىستىق اۋرۋحاناعا اۋىستىرىلدى. بۇعان دەيىن ناۆالنىيدى ەمدەگەن دارىگەرلەر ونىڭ قان ءاناليزىنىڭ قورىتىندىسىن جاريالاپ، دارىگەر اناستاسيا ۆاسيلەۆا ناۋقاستىڭ جۇرەگى توقتاپ قالۋى مۇمكىن دەپ ەسكەرتكەن.

ناۋرىزدىڭ سوڭىندا مىڭنان استام دارىگەر بيلىككە اشىق حات جازىپ، ساياساتكەرگە تاۋەلسىز دارىگەردى كىرگىزۋگە شاقىرعان.  ال بۇگىن دارىگەرلەر ناۆالنىيدىڭ ءحالىن ءبىلۋ ءۇشىن ارنايى بارعان. بىراق تۇرمە اكىمشىلىگى ولاردىڭ كىرۋىنە رۇقسات ەتپەگەن. ماماندار وپپوزيتسيونەردىڭ جاعدايى اۋىر دەيدى.

"The Qazaq Times"