دەنساۋلىق ساقتاۋ ءمينيسترى ا.تسوي. فوتو: وكق

قازاقستاندا كوروناۆيرۋس جۇقتىراتىنداردىڭ كۇندىك كورسەتكىشى مامىر ايىنىڭ ورتاسىندا شىرقاۋ شەگىنە جەتۋى مۇمكىن. بۇل تۋرالى بۇگىن، 20 ساۋىردە ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي  مالىمدەدى. 

ونىڭ ايتۋىن قاراعاندا، ەلدە ناۋرىز ايىنىڭ سوڭىندا ەپيدەميولوگيالىق احۋال ناشارلاپ، ناۋقاستانۋ كورسەتكىشى 46 پايىزعا دەيىن ارتقان، قازىر احۋال جاقسارىپ كەلە جاتىر.

"دەنساۋلىق ساقتاۋ مينيسترلىگى حالىقتى ۆاكتسيناتسيالاۋمەن قامتۋدى ەسكەرە وتىرىپ، كوروناۆيرۋستىڭ تارالۋىنىڭ دامۋىنا بولجامدى وزەكتەندىرەدى. كەستەگە سايكەس، ۆاكتسيناتسيا جالعاسقان جاعدايدا وپتيميستىك ستسەناري بويىنشا تاۋلىگىنە 3 مىڭ كەيسكە دەيىن تىركەلىپ، ءساۋىردىڭ سوڭىندا شىرقاۋ شەگىنە جەتەدى دەپ بولىپجادىق" دەدى تسوي.

ونىڭ ايتۋىنشا، رەاليستىك ستسەناري جاعدايىندا جانە ۆاكتسيناتسيا كەستەگە ساي جۇرگىزىلگەندە كوروناۆيرۋس جۇقتىرۋ تاۋلىگىنە 4 مىڭ جاعدايعا جەتىپ، شىرقاۋ شەگى مامىر ايىنىڭ ورتاسىندا بولۋى مۇمكىن.

ء"بىرىنشى كەزەڭدە ۆاكتسيناتسيا تيىمدىلىگى يممۋنيتەت قالىپتاسۋىنا ۋاقىت قاجەت بولۋىنا بايلانىستى شەكتەۋلى بولادى. ودان كەيىن ۆاكتسيناتسيا اسەرى كۇشەيىپ، ەلدەگى ەپيدەميولوگيالىق احۋالدىڭ تۇراقتانۋىنا ىقپالىن تيگىزەدى" دەدى مينيستر.

دەنساۋلىق ساقتاۋ مينيسترلىگىنىڭ مالىمەتىنشە، ەلدە 2020 جىلدىڭ ناۋرىز ايىنان بەرى 292 250 ادامنىڭ كوروناۆيرۋس تەستى وڭ شىققان. سودان بەرى 3436 ادام قايتىس بولعان. كوروناۆيرۋس ينفەكتسياسى انىقتالعان، بىراق ولىمىنە "باسقا اۋرۋ سەبەپ بولدى" دەلىنگەن مىڭعا جۋىق ادام ءولىمى بۇل ستاتيستيكاعا ەنبەگەن. بۇدان بولەك، ەلدە بىلتىرعى 1 تامىزدان بەرى  51 890 ادامعا كوروناۆيرۋس پنەۆمونياسى دياگنوزى قويىلعان. ولاردىڭ 754-ءى كوز جۇمعان.

قازاقستاندا 1 اقپاننان بەرى كوروناۆيرۋسقا قارسى ۆاكتسيناتسيالاۋ ءجۇرىپ جاتىر. دەنساۋلىق ساقتاۋ مينيسترلىگىنىڭ مالىمەتىنشە، 733 980 ادام (حالىقتىڭ 3,9 پايىزى) كوروناۆيرۋسقا قارسى ۆاكتسينانىڭ ءبىرىنشى دوزاسىن العان.

"The Qazaq Times"